Calamity fund dapat gamiton na subsidia sa NFA - VP Leni

Pili, Camarines Sur – Kinakaipuhan na an subsidia kan gobiero nasyonal sa palay procurement program kan National Food Authority (NFA) na pueding gamiton muna an calamity fund huli ta mayo nang mga paraoma an nagpapabakal digdi nin inaning paroy envez nadalagan na sa mga pribadong comprador mantang mas halangkaw an presyo. Ini an mga pahayag ni Bise Presidente Leni G. Robredo kan makuanan nin entrevista kan media matapos kan saiyang paglibot sa mga tiendahan nin bagas sa mercado publiko kan banwaan nin Pili kan Miercules, Marso 14. Saiyang pig-araman an kamugtakan kan suplay nin NFA rice na limitado na an distribusyon sa mga acreditadong NFA rice retailers mantang nagkukulang na an stock nin bagas asin naghahalat pa an ahencia kan masunod na pag-abot kan imported rice. Sinabi kan Bikolanang bise presidente na masurat siya ki Presidente Rodrigo Duterte nganing hagadon an tabang sa subsidia sa palay procurement program na an fondo hali sa calamity fund kan gobierno nasyonal. An presyo kan paroy sa mga pribadong comprador nagdadalagan sa P19 hasta P20 cada kilo alagad sa NFA nagcacantidad sana nin P17 hasta P17.50. Nganing magbalik an normal na suplay nin bagas asin an saindang food security dapat hanapan na nin solusyon mantang halangkaw an produksyon nin paroy sa Camarines Sur maging sa iba pang provincia kan Kabikolan, sabi pa. Kinumfirmar kan NFA Camarines Sur na nagpundo sinda sa pagsuplay nin bagas sa mga NFA rice retailers huli ta nagkukulang na an saindang stock alagad kan mag-abot si bagong imported rice nagbuelta an saindang pagdistribuer sa mga mercado alagad limitado. Bako lang digdi sa Kabikolan nagkukulang an stock nin bagas kan ahencia envez sa iba pang mga rehiyon na pigdududahan yaon na sa mga bodega kan darakulang negocianteng bagas. (DPAureus)