Pahayag ni Duterte: ‘shoot the vagina’ pigdenunciar sa rally

Pambabastos asin hababang pagheling sa mga kababaehan an mga pahayag ni Presidente Rodrigo Duterte na ‘’mga rape jokes, condoms asin shoot the vagina para sa mga babaeng New People’s Army’’. Sa ginibong actividades kan sektor nin kababaehan sa Camarines Sur asin Albay sa pagcelebrar kan International Women’s Day kan Marso 8 an isyung ‘’shoot the vagina’’ para sa babaeng NPA saro sa pigdenunciar kan progresibo asin militantanteng grupo afuera kan saindang panindugan contra sa charter change asin Tax Reform for Acceleration and Inclusion (TRAIN). Ini an mga pahayag ni Nelsy Rodriguez lider kan Bayan asin Gabriela sa Camarines Sur huli ta salto na an mga binubutasan na mga pahayag ni Presidente Duterte na mayong respeto sa saindang sektor asin nagluluwas an hababang pagheling kaini sa sainda. An pahayag kan Presidente sa tahaw kan saiyang campaña laban sa insurhencia, alagad dai nasunoan kan sektor nin kababaehan. Sinabi pa na naglalangkaw na ngani an casong pang-aabuso sa kababaehan sa nasyon huli sa ‘’pangangalandakan mismo mula sa pinuno ng bansa’’ Saindang pigbasehan sa listahan kan Camp Simeon Ola kan Bikol PNP digdi sa satong rehiyon igwang 909 casong pang-aabuso poon kan Enero hasta Noviembre 2017. Nangenotan an Camarines Sur namay 247 caso, Albay – 119, Masbate – 98. Dai pa kabali digdi si dai na nagsosombong sa mga awtoridad. Nakaka-alarma an mga casong rape alagad ginigibo pang pagsuba kan presidente apesar na seryoso an dapat orolayan sa satong nasyon. Kasabay kan aniversaryo, kabali sa saindang pigkurahaw sa protesta iyo an pagcontra sa charter change asin marikas na pag-implemenetar TRAIN Law na direktang apektado an tios na familia huli kan pag-ulanto kan mga mayor na produkto sa mercado. Base sa survey kan 2016, maabot sa siete milyon na kababaehan Filipino an kabali sa mga mayong trabajo, self-employed asin unemployed family workers sa agrikultura an apektado kan TRAIN law.