PS Lalas mayong iniciatibo

Huli kan kawaran iniciatibo ni Project Supervisor/Acting General Manager Nelson Lalas kan Camarines Sur II Electric Cooperative (CasurecoII), an Sangguniang Panlungsod kan Ciudad nin Naga nagpasar na nin resolucion nganing hagadon sa PS/AGM na gamiton na an saindang Capital Expenditures (CAPEX) nganing ponan na an relokasyon kan mga electrical post na ulang sa mga road widening project kan DPWH. Si Consejal Lito Del Rosario iyo an nangenotan sa pagpadreno kan resolucion na pinaboran kan gabos na miembros kan consejo nganing ipadara na sa Casureco II. Si Del Rosario, na dating director kan Casureco II nagsabi na aram niya na igwang milyones pesos na fondo sa CAPEX asin gamiton na muna ini asin kun yaon na an fondo hali sa DPWH pueding paabonaran. An resolucion kan SP matapos maging bisita sa sesyon regular kan nakaaging semana si Casureco I General Manager Ana Sylvia Alsisto na saiyang pigpaliwanag na an saindang ginibong aksyon na dai na muna maghalat kan fondo sa DPWH ginamit na muna ninda an cuarta hali sa CAPEX asin iyo na an ginamit sa gastos sa relokasyon kan mga poste alagad aabonaran kan DPWH. Afuera pa kaini, an Casureco I nakabakal na nin bagong mga poste alagad sa Casureco II nag-aasikaso pa sana kan mga papeles. Langkag na an SP sa abalang relokasyon kan poste kan Casureco dos huli ta mapaso sa Agosto 2018 an pigtaong plaso kan Department of Energy base sa memo circular alagad mayo pang ginigibong iniciatibo si Lalas arog kan ginibong lakdang kan Casureco I. Afuera pa kaini delikado sa mga aksidente sa motorista an mga ulang na poste na haros yaon na sa tahaw kan mga tinampo na sakop kan national road. Na-aabala an pagbayad kan DPWH sa gagastoson na relokasyon sa mga electrical post huli ta saindang pig-cucuestion an halangkawon na cuentada kan cooperativa na nagcacantidad nin P16.8 milyon mantang sa cuentada kan 2nd Engineering District nag-aabot sana sa P9.2 milyon. Huli kan conflictong cuentada isinakat an isyu sa Legal Department kan DPWH central office asin DoE nganing iyo na an magdesisyon. (DPA)