SA CIUDAD NIN NAGA: P149M na TRIPP project iimplementar kan DPWH

Papabulosan nin P149 milyon an lokal na gobierno kan Ciudad nin Naga hali sa gobierno nasyonal para sa proyecto sa infrastraktura alagad an opisina rehiyonal kan Department of Public Works and Highways (DPWH) sa Bikol iyo an ma-implementar kan road widening project sa mga barangay haling Del Rosario pasiring sa mga itaas na mga barangay kan Cararayan, San Isidro asin Carolina. Ini an kinumpirmar sa Bicol Mail ni Alcalde John Bongat matapos saindang hagadon an dakulang fondo sa lindong kan Tourism Road Infrastructure Program Prioritization (TRIPP), na kun haen an Arts Culture and Tourism Office (ACTO) iyo an benipisyaryo kan programa ngonian na taon. Katuyohan kaini na mapaangat an programa sa turismo kan City Hall mantang an itaas na mga barangay kan ciudad pigdadayo na nin turista arog kan bantogan na Malabsay Falls asin yaon pa digdi an Panicuason Hot Springs Resort kabali an bagong facilidades arog kan ‘’zip bikes and tarzan swings’’. Sinabi pa kan jefe ejecutivo kan ciudad na nakatalaan nang isubasta kan DPWH an proyecto nganing maimplementar kan ahencia ngonian na taon. An Cararayan-San Isidro-Carolina road kabali sa resolucion na inaprobaran kan Sangguniang Panlungsod na iconverter sa national road na padreno si Consejal Vidal Castillo, pamayo kan committee on infrastructure alagad posibleng dagos nang aprobaran kan DPWH mantang saindang iimplementar an road widening project. Sinabi pa ni Castillo na oras matapos an road widening project makakatabang sa paglaog nin mga dayuhan na turista sa ciudad mantang ribo-ribo nang mga dayuhan na turista an regular nang nagsasakat sa Malabsay Falls asin Panicuason Hot Spring Resort. An City Hall enot naghagad nin tabang sa 2nd Engineering District kan DPWH sa Baras, Canaman, Camarines Sur para sa TRIPP project alagad sinabi ni Assistant District Engineering Richard Emmanuel Ragragio sainda ining pig-endorsar sa central office nganing matagamahan nin fondo asin na-aprobaran sagcod na natagamahan nin P149 milyon para sa ngonian na taon. An Carolina-San Isidro-Cararayan road yaon pa sa lokal na gobierno kan ciudad alagad mantang para sa programa sa turismo dai na ini kaipuhan dawa dai pa nacoconvertir sa national road, sabi pa ni ADE Ragragio. Pig-aandaman na kan City Hall an liwat na paghagad nin fondo para sa 2019 national budget nganing maimplementar an road improvement kan Almeda Highway sa Concepcion Grande nganing facil an viaje pasiring sa Naga Airport sa Pili, Camarines Sur maging sa Bicol Central Station. Kaayon sa plano digdi kan ciudad iyo an pagbugtak nin bicycle asin jogging lanes mantang makakabawas pa sa problema sa bulos nin trafico sa Roxas Avenue asin Maharlika Highway, kabali na sa Concepcion Grande asin Pequeña. (dpaureus)