SABI KAN DOTr: Modernisasyon kan Naga Airport iimplementar na

An Department of Transportation (DOTr)nagkumfirmar sa Sangguniang Panlungsod kan Ciudad nin Naga na igwa nang enot na pig-alokar na fondo an ahencia nin P1 bilyon para sa Re-Orientation and Modernization of Naga Airport kan taon pang 2016. Alagad an ‘’obligated budget’’ na ini na dapat iimplementar na kan Civil Aeronautics Aviation of the Philippines (CAAP) ngonian na taon na iyo an dahilan na mayo pang pigtatagamang budget an DBM para sa presenting taon 2018 mantang an P402 milyon yaon na sa Capitolyo Provincial para sa land acquisition na pig-alokar kan taon 2015. Sa mga pahayag sa media ni Bise Presidente Leni Robredo kan Septiembre kan nagtalikod na taon mayo siyang naheling na prosupuesto na pigtagama para sa aeropuerto para sa taon 2017 sa irarum kan budget kan DOTr. An isyu sa fondo kan aeropuerto enot nang hinahagadan nin paliwanag Robredo si DOTr Secretary Arthur Tugade alagad dai man ini nagtataong toltol na inpormasyon. Sa surat na pigpadara ki Gil dela Torre, sekretaryo kan Sangguniang Panlungsod kan ciudad petsado Enero 16, 2018 hali sa DOTr asin firmado ni Undersecretary for Aviation and Airport, Capt. Manuel Antonio Tamayo alagad narecibe sana kan Marso 7, 2018 piglinaw kaini na an P1 bilyon downloaded na sa paagi nin MOA sa CAAP nganing iimplementar na an proyecto. Afuera pa kaini, an cantidad P402 milyon na alokasyon para sa land acquisition na pig-iimplementar sa paagi nin Memorandum of Agreement (MOA) sa Capitolyo Provincial kan Camarines Sur. An natatada pang balancing P233 milyon para sa taon 2015 pig-download na sa CAAP nganing iimplementar. Si Gobernador Migz Villafuerte enot nang nagsabi na preparado na an P402 milyon para sa compensasyon sa mga kagsadiri nin daga na ma-aapektaran kan airport development project. An surat kan DOTr bilang kasimbagan sa resolucion kan SP No. 2017-567 na hinahagad sa ahencia na ibuelta sa 2018 General Appropriation Act an fondo na enot nang pigtagama para sa Naga airport development. Sinabi pa kan undersecretary kan DOTr na an sinambit na obligated budget para sa aeropuerto iimplementar kan CAAP ngonian na taon, alagad an ahencia asin an Department of Budget and Management (DBM) dai na natagama nin fondo para sa infrastructure budget para sa current year 2018. Alagad, an para sa taon 2019 budget pigcoconsiderar na ipadagos an implementasyon kan proyecto sa aeropuerto, na kinakaipuhan pa an annual budgetary ceiling kan DBM sa ahenciang ini, sabi pa. Sa sesyon regular kan Sangguniang Panlungsod kan Martes, Marso 13 sinabi ni Bise Alcalde Nelson Legacion na saindang iimbitaran sa Marso 23 an regional director kan CAAP digdi sa Bikol nganing hagadan nin detalye sa kamugtakan kan proyecto sa Naga Airport sa Pili, Camarines Sur. Kan nagtalikod na administrasyon ni Presidente Noynoy Aquino igwa nang prosupuesto an proyecto sa aeropuerto na nagcacantidad nin P3.5 bilyon, alagad dai na-implementar mantang pataposon na an saiyang termino. (dpa)