AGM Lalas turog sa pancitan, sabi

Dapat haloy nang nagdesisyon si Project Supervisor/Acting General Manager Nelson Lalas kan Camarines Sur II Electric Cooperative (Casureco II) sa pagpaluwas nin fondo hali sa Capital Expenditures nganing gamiton sa relokasyon kan mga electrical post dai na halaton an cuarta hali sa Department of Public Works and Highways (DPWH). Segurado man na aabonaran kan DPWH alagad naabala sana an proceso kaini. Madaling magibohan nin solusyon an problema sa mga electrical post na yaon sa laog kan road right of way kan national road kun bako si Lalas an PS/AGM na iyo man sana an nagpapadicil sa haloy nang isyu sa relokasyon kan mga poste. An junta directiva bulan pa ni Enero 2018 nagpasar na nin resolusyon na halion na sa Casureco II si Lalas huli kan maluyang performance, alagad mayo pang ginigibong aksyon an National Electrification Administration (NEA). Ini an mga pahayag ni director Jun Cornelio kan Naga North District kan Casureco II sa atubangan kan mga nagiging tuyaw kan Sangguniang Panlungsod kan Ciudad nin Naga mala ngani nagpasar na nin resolusyon na hinuhorot si Lalas na gamiton na muna an saindang Capital Expenditures para maponan na an relokasyon kan mga electrical post. Si Consejal Joselito Del Rosario, dating director kan Casureco II iyo an nagpadreno kan resolusyon huli ta aram niya na igwang milyones pesos na fondo an cooperativa sa CAPEX na pueding gamiton muna mantang ciertong babayadan ini kan DPWH. Kun nagibo kan manijamiento kan Casureco I na pinamamayohan ni General Manager Ann Sylvia M. Alsisto an pagbalyo kan mga poste sa tamang lugar hali sa laog kan mga pig-iimplementar na road widening project kan DPWH, ano ta dai nagigibo ni Lalas? Sinabi pa na pabor an junta directiva gamiton na muna an fondo kan CAPEX, alagad an problema yaon ki Lalas huli ta pighahalat pa an P16 milyon kan DPWH para relokasyon kan mga poste. An 2nd Engineering District kan DPWH sa Baras, Canaman, Camarines Sur nagcucuestion kan halangkaw na cuentada kan Casureco II na P16.8M mantang sa obras publika nagcacantidad nin P9 milyon na nagsunod sana sinda sa formula base sa joint memorandum circular kan DPWH central office asin kan Department of Energy. Huli kan cuestion sa halangkaw na cuentada kan cooperativa nin electricidad pinapaadalan muna sa legal department kan DPWH asin DOE antes magpaluwas nin fondo an obras publika para sa relokasyon kan mga electrical post. An SP kan City Hall nagpasar nin resolucion huli ta mapaso na sa Agosto 2018 an joint memo circular kan duwang ahencia na kun magpalyar na dai matapos an relokasyon kan mga poste, an cooperativa nin electricidad iyo an may obligasyon sa gastos. Disganado na si Bise Alcalde Nelson Legacion sa manijamiento ni Lalas huli ta kun dai magkakaharali an mga ulang na poste sa mga road widening project delicado sa mga aksidente sa motorista. Pigpaliwanag man ni Lalas na dai pa sinda makapoon sa relokasyon kan mga poste huli ta kaipuhan magpaluwas muna nin bayad an DPWH. (dpa)