PAGIRUMDOM SA AFP, NPA: SP: Igalang an sona nin katuninongan

Pinagirumdom kan Sangguniang Panlungsod an CPP/NPA maging AFP na nagdadanay sa Ciudad nin Naga an magduduwa nang decadang resolucion na nagdedeclara sa ciudad na ini bilang sona nin katuninongan asin kun mawot nindang magralaban bako sa ciudad, igalang an lugar na ini. Sa privilege speech ni Consejal Joselito Del Rosario sa sesyon regular kan Sangguniang Panlungsod kan Martes, Marso 20 na ginibo sa covered court kan Barangay Mabulo saiyang pigtawan doon an resolucion kan Sanggunian na may titulong ‘’Declaring Naga City as Zone of Peace Freedom and Neutrality’’ Si Congresista Gabby Bordado kan tercer distrito kan Camarines Sur kan miembro pa kan consejo sa paagi kan saiyang privilege speech nangapodan sa mag-ibong na lado na irespeto an ciudad na ini bilang sona nin katuninongan. An saiyang aksyon kasunod kan nangyaring pag-atake kan NPA sa Police Sub Station No. 6 sa Brgy. Carolina na may nagadan na sarong pulis. Binuhay ni Del Rosario an resolucion kasunod kan nangyaring pagkakabadil gadan ki Alfredo Merilos, secretary kan Bicol Regional Party Committee kan Communist Party of the Philippines asin kan saiyang kaibanan na pigbistong si Liza Beriso Ocampo sa nangyaring soboot pabalyohan nin putok sa sarong harong sa Barangay Cararayan, sa ciudad na ini mga bandang alas 9:25 banggui. Maserbe nin mandamiento de aresto an mga soldados kan 9th Infantry Division kan Philippine Army asin Naga City Police Office alagad nagkaigwa nin pabalyohan nin putok an mga awtoridad asin an lider kan CPP/NPA, sabi sa miembros kan media ni Senior Police Officer 2 Tobias Bongon. Huli kan sinambit na insidente na-alarma an residentes kan Barangay Cararayan maging sa iba pang itaas na barangay kan ciudad. An Ciudad nin Naga declarado bilang sarong sona nin katuninongan dapat irespeto kan mag-ibong na lado asin kun mawot nindang magralaban bako na sa ciudad na ini gibohon, sabi pa kan consejal kan makuanan entrevista kan Bicol Mail. An ciudad na ini digdi pigcecelebrar an regional fiesta ki Nuestra Señora de Peñafrancia cada bulan nin Septiembre asin nagiging matuninong an mga actividades kan simbahan asin kan lokal na gobierno na naiibitaran an encuentro kan rebeldeng grupo asin kan AFP maging PNP na saindang pigrerespeto an declarasyon sa sona nin katuninongan. Binukasan kan consejal an kahagadan para sa katuninongan sa paagi nin privilege speech alagad sa sesyon regular ngonian na Viernes, Marso 23 ipapagirumdom sa publiko an resolusyon nganing igalang kan mag-ibong na lado. Piglinaw kan ni Del Rosario kun an law enforcer may operasyon asin may bitbit nin mandamiende de aresto iyan saindang trabajo na dapat iimplementar alagad kun mabaradilan bako na sa laog kan ciudad. An nagadan na lider kan CPP/NPA nag-aatubang nin casong murder base sa criminal case number 2012-0020 sa pig-isyung mandamiento de aresto kan Regional Trial Court Branch 24 petsado Enero 21, 2013. (dpaureus)