Pirilian sa Brgy., SK segurado na

Aprobado na alagad sagcod na sana sa ika-duwang asin ika-tolong pagbasa sa Camara-Baja an propuestong ley na liwat naman i-uktaba an Barangay asin Sangguniang Kabataan (SK) elections sa Oktubre 2018 envez na Mayo 14, 2018. Sinda Senador Sonny Angara asin Congresista LRay Villafuerte kan segundo distrito kan Camarines Sur parejong nagpahayag na imposible nang marealisar na makalusot pa an house bill para sa ika-tolong veces na pag-uktaba kan brgy asin SK elections. Si Angara asin Villafuerte nag-atubang sa press conference dai palang nahahaloy na ginibo sa CWC sa Capitolyo Provincial sa Pili, Camarines Sur parejong nagsabi na madiklom na an paglaom kan ibang mga lehislador sa pag-uktaba kan pirilian mantang mayo nganing nagpapadrenong bill sa senado sa kaparejong version sa pag-uktaba kan pirilian. Lusot na kuta sa ika-duwang pagbasa alagad mapahingalo na an congreso kan saindang sesyon na sundo na sana ngonian na Juevez, Marso 22 asin mabuelta sinda sa trabajo sa Mayo 14, 2018 aldaw na kan pirilian, mayo pang nagplantiar nin bill sa senado, kaya dapat mag-andam na an mga macandidato sa barangay asin SK, sabi pa ni Villafuerte. Dai na ngani masarong semana ma-recess na sinda mayo pang nakasangat nin bill sa senado, huli kaini madadagos an pigtalaan na pirilian, sabi man ni Angara. Duwang veces nang pig-uktaba an pirilian asin napalawig na an termino kan opisyales de barangay huli kaini mayo nang nagplantiar nin bill sa senado na i-uktaba naman sa ika-tolong veces. An Commission on Elections (Comelec) nagpadara na kan ibang mga paraphernalia sa saindang mga opisina lokal bilang pag-andam kan pirilian sa Mayo 14. Sa Abril 14 iyo na an pagplantiar nin certifico de candidura hasta sa Abril 20. An Comelec nagpaluwas na kan saindang resolusyon numerado 10246 petsado Enero 15, 2018 para sa calendar of activities asin peryodo kan mga prohibited acts sa nagdadangadang pirilian.