Proceso sa proyecto kan Naga Airport pigpoponan na kan DOTr

Yaon na sa proceso an Department of Transportation (DOTr) sa implementasyon kan re-orientation and modernization of Naga Airport na namumugtak sa Pili, Camarines Sur mantang igwa nang detalyadong desinyo na dapat maponan ngonian na taon. An enot na trabajo iyo an pagkudal kan gigibohan na pagpahiwas kan runway asin kaayon na digdi iyo an construksyon kan drainage canal, re-alignment kan irrigation canal, utilities and airside facilities, sabi ni Cynthia Tumalot, Bicol Area Manager kan Civil Aeronautics Aviation of the Philippines (CAAP). Si Tumalot naging visita sa sesyon regular kan Sangguniang Panlungsod kan Ciudad nin Naga nganing hagadan nin pinakahuring informasyon sa isyu kan re-orientation kan aeropuerto na sagcod sa ngonian dai pa napoponan an implementasyon kan proyecto na pigtagamahan nin P3.5 bilyon kan nakaaging administrasyon ni Presidente Noynoy Aquino. An implementasyon kan proyecto hali sa enot na pinaluwas na P1 bilyon na pig-download na sa paagi nin MOA sa CAAP kan 2016, duwang taon na an nakakaagi. Kan 2015, cantidad P402 milyon an pig-alokar para sa nagpapadagos na land acquisition asin pig-iimplemenetar sa paagi nin Memorandum of Agreement sa Capitolyo Provincial kan Camarines Sur. An natatadang balanse sa budget kan 2015 (P233-M) pig-download na sa CAAP para sa implementasyon kaini. Sinabi pa kan CAAP Bikol na dai pa mapaluwas nin dugang na fondo para sa ngonian na 2018 an Department of Budget and Management (DBM) sagcod na dai pa nagagamit an enot na pinaluwas na fondo afuera kan abalang proceso sa implementasyon sa re-orientation kan Naga Airport. Sa surat petsado Enero 16, 2018 ni Usec Manuel Antonio Tamayo kan DOTr sa Sangguniang Panlungsod alagad narecibe sana kan Marso 7, 2018, sinabi kaini na an dugang na budget para sa taon 2019 sa pagpadagos sa implementasyon kan proyecto sa aeropuerto, alagad kinakaipuhan pa an alokasyon sa annual budgetary ceiling kan DBM sa ahencia. An sektor nin negociante, opisyales lokal maging sinda Bise Presidente Leni Robredo asin 3rd District Congressman Gabby Bordado langkag na sa implementasyon kan proyecto mantang maulyas magpaliwanag si DOTr Secretary Arthur Tugade kan kamugtakan sa re-orientation project. (dpa)