Road widening proj kan Almeda hi-way hahagadan fondo sa DOT

An Arts Culture and Tourism Office (ACTO) kan lokal na gobierno sa Ciudad nin Naga liwat naghagad nin fondo sa Department of Tourism (DOT) para sa 2019 national budget kan ahencia na nagcacantidad nin P200 milyon nganing gamiton sa iimplementar na road widening project kan cinco kilometros na Almeda Highway sa Concepcion Grande. Si Alex Francis Santos, jefe kan ACTO nagsabi sa entrevista kan Bicol Mail na saiya nang pigsumiter sa opisina sentral kan DOT an propuesto kan City Hall na an katuyohan kaini para sa programa sa turismo kan lokal na gobierno kan ciudad sa lindong kan Tourism Road Infrastructure Prioritization Program (TRIPP). Na enot kaini an ACTO nakahagad nin P149 milyon sa kaparejong ahencia para sa road improvement poon sa Del Rosario pasiring sa mga pasakat na barangay kan Cararayan, San Isidro asin Carolina na iimplementar kan opisina rehiyonal kan Department of Public Works and Highways (DPWH) na pigsubasta kan Enero 18, 2018 asin naghahalat nalang nin notice to proceed an contractor nganing iimplementar ngonian na taon. An itaas na barangay kan ciudad pigdadayo nin mga turista arog kan bantogan na Malabsay Falls asin yaon pa digdi an Panicuason Hot Spring Resort kabali an bagong facilidades arog kan zip bikes and tarzan swings. Afuera pa kaini, si turista na haling Naga Airport sa Pili, Camarines Sur mapapalipot pa an saindang oras nin viaje pasiring sa tourist destination kan ciudad. Sinabi ni Assistant District Engr. Richard Ragragio kan 2nd Engineering District kan DPWH sa Baras, Canaman, Camarines Sur an arin man na road improvement asin road widening project kan lokal na gobierno kun an proyecto para sa programa sa turismo dai kaipuhan na iconverter sa national road an municipal road na an fondo maghahali sa TRIPP kan DOT. Kun marealisar an road improvement kan Almeda Highway mapalipot pa kan viaje nin mga turista kun haling south road na dai na kaipuhan mag-agi sa mahibog na bulos nin trafico sa mga lugar kan Concepcion Grande, Concepcion Pequena, asin Panganiban Drive na puedeng magruta pasiring sa Del Rosario- Cararayan-San Isidro- Carolina road na makonektar sa Mt. Isarog. Makakabawas pa sa trafico sa centro kan ciudad asin maparikas pa kan travel time, sabi pa ni Santos. An P200 milyon gagamiton para sa pagpaconcreto kan Almeda Highway kabali na digdi an drainage project asin iba pang road improvement mantang mayong problema sa mga electrical post kan Camarines Sur II Electric Cooperative (Casureco II). (dpaureus)