SA PROTESTA NI LRV SA HRET: Rebisyon kan mga balota nagdudugang pabor ki GB

Pinonan na kan Martes, Abril 3 sa House of Representative Electoral Tribunal (HRET) an mano-manong pagbilang asin rebisyon kan mga balota sa duwang banwaan kan Bombon, Calabanga asin Ciudad nin Naga sa pitong mga banwaan asin sarong ciudad kan tercer distrito kan Camarines Sur na pigprotesta ni dating Diputado Luis R. Villafuerte contra ki Diputado Gabriel H. Bordado Jr, alagad sa mano-manong pagbilang nagdadagdag an voto pabor sa nakatukaw na diputado. Sa pinaabot na informasyon sa Bicol Mail ni Ms. Glenda Dasco, chief of staff kan District Office ni Bordado, sinabi kaini na sa ika-duwang aldaw na mano-manong pagbilang asin rebisyon kan treintang mga ballot boxes hali sa Bombon asin Calabanga nagiging paborable sa incumbent congressman kan tercer distrito mala ngani nadadagdagang pa an saiyang voto. An HRET pinamamayohan ni Associate Justice Presbitero Velasco Jr. kan Corte Suprema piglalaoman na matatapos sa laog nin walong aldaw an mano-manong pagbilang. Sa ginibong pirilian kan Mayo 2016, si Bordado nakalamang nin sobra sa 19 mil na voto laban ki Villafuerte na dakulang kalamangan nin voto an nakua niya sa Calabanga na digdi siya namundag asin sa Ciudad nin Naga na naging consejal asin bise alcalde nin veinte años . An dating congresista nagprotesta huli kan soboot nangyaring complekadong resulta kan pirilian, dai kabali sa saiyang mga pigprotesta iyo an mga banwaan kan Ocampo, Pili, Magarao,Canaman, asin Camaligan, gabos sa tercer distrito kan Camarines Sur. Haros magkasabay an mano-manong pagbilang nin mga balota ninda Bise Presidente Leni Robredo kan Presidential Electoral Tribunal (PET) sa protesta ni dating Senador Ferdinand ‘’Bongbong’’ Marcos Jr. asin ni Bordado sa HRET. Ipinahayag kan congresista sa miembros kan media na tiwala siya na gaganahon ninda Robredo an protesta. ‘’Lamang ako nin sobra sa 19 mil na voto dai ko aram kun pano ko madadaog digdi I believed in electoral process, I believed sa credibilidad kan Commission on Election, HRET asin PET, I believed the truth will prevail gustong sabihon gana po kami ni Leni sa recount na ini’’ Sinabi pa ni Bordado nagtutubod kaya si LRV na igwa ining pig-eestaran sa San Bernardino gaganahon niya an pirilian sa Calabanga, alagad siya an tunay na Calabangueño huli ta digdi siya namundag asin nagtapos pagklase sa elementarya. Nagtutubod pa siya na dificil nang malamag an labi sa 19 mil na lamang niya sa resulta kan pirilian sa tercer distrito. Antes nagpuon an ballot recount sa HRET, an congresista asin saiyang mga suportadores nag-atendir muna nin misa sa San Francisco Church sa Ciudad nin Naga, pakahali digdi tolos nag-viaje sa paagi nin South road pasiring sa congreso. Si Bordado iyo an pigproclamar kan Provincial Board of Canvassers bilang ganador sa nagtapos na pirilian kan Mayo 10, 2016. (dpa)