Caravan piglansar vs Cha-Cha

Ipinaheling kan mga Bikolano an saindang panindugan contra sa Charter Change kan administrasyon Duterte sa paagi kan ginibong apat na aldaw na Bicol Caravan 2018 na pigparticiparan kan rinibong miembros asin lider kan progresibo grupo hali sa anom na provincia kan Kabikolan. Nagpoon an Caravan kan Abril 9 hali sa Ciudad nin Sorsogon na nag-agi sa Donsol, Pilar asin Castilla asin iba pang mga banwaan kan provincia nin Sorsogon asin nagkaigwa kan saindang torch parade asin solidarity night sa Albay, Camarines Sur kan Abril 11 asin hasta sa Camarines Norte kan Abril 12. Si haling Catanduanes asin Masbate nagtiripon na sa Albay asin digdi nag-iba sa grupo pasiring sa Sorsogon nganing magsabay na sa Caravan pasiring sa Albay, Camarines Sur asin Camarines Norte. Sinabi ni Dan Balucio kan BAYAN- Bikol an gabos na progresibong grupo sa Bikol nagkasararo nganing ipamate ki Presidente Rodrigo Duterte asin sa congreso an saindang pusog na pagcontra sa Cha-Cha huli ta bako man ini an solusyon sa pagtios. An caravan ginibo nganing ipadagos an saindang serye nin edukasyon sa cada distrito na saindang inaagihan nganing maintindihan kan publiko kun tano ta dapat ibasura an propuestong pagribay kan presenting sistema nin gobierno pasiring sa Federalismo. Katuyohan kan Cha-Cha na luway-luway mahalian nin saiyang propriedad o daga an mga paraoma asin nganing mapakinabangan kan mga dayuhan, sabi pa ni Balucio. An mga raliyista may dara nin mga placards na nagdedenuncia kan ‘’Diktadura ng rehimeng US-Duterte, pagbasura kan TRAIN Law na mayormenteng apektado iyo an dati nang mga nagtitios na namamanuan. Sinabi pa ni Balucio na sagcod sa ngonian mayong pinapasunod na bagong dagdag na sueldo sa mga minimum wage earners mala ngani perang taon nang nakapako sa P290 na aldia. Dagos nang tinalikodan an pangakong pagtunaw sa ENDO o kontraktwalisasyon kasunod kan pagpabor sa ENDO King na si Henry Sy na kagsadiri kan mga SM malls sa mga ciudades sa Camarines Sur, Albay asin Sorsogon digdi sana sa Bikol. (dpa)