PAMAYO KAN INVESTMENT SCAM DAKOP NA KAN CIDG: Syndicated estafa case binaba sa casong estafa

An National Bureau of Investigation (NBI) sa Ciudad nin Naga nagkumfirmar na syndicated estafa an saindang pigrecomendar na caso sa Provincial asin City Prosecutors na envuelto an P500 milyon contra sa nadakop na si Joel SJ Agnabo base PD 1689 asin anom pa kaining kasososyo sa investment scam na Roco Agnabo Lending (RAL), Corporation na may viente mga nagrereclamo na isinakat sa Department of Justice alagad nahulog sa 3 counts of estafa cases. Ini an mga pahayag ni NBI Investigator Rex Solano alagad nagtutubod siya na posibleng igwa pang masunod na mandamiento de aresto oras na igwa pang ibang iluwas na resolusyon an DOJ Manila nganing isakat an caso sa jusgado. Kabali sa listahan na saiyang mga na-victima igwang mga retiradong opisyal kan gobierno, PNP, Philippine Army, maging politico, paratukdo sa escuelas publica asin katabang sa harong na nagparatipon nin cuarta alagad dai ninda aram na manluloko palan an RAL. Duwang taon nang pendiente an caso matapos isangat kan NBI sa fiscalia alagad dai niya maaraman kun tano ta naisakat pa ini sa DOJ na iyo na an nagconducir kan preliminary investigation. An NBI sa Ciudad nin Naga dating opisina rehiyonal na ginibo na sanang district office nagrecomendar sana kan casong syndicated estafa contra sa mga suspechado alagad an fiscalia o maging DOJ iyo na an nagseserne sa caso huli ta sinda an may poder sagcod na nahulog na sana sa casong estafa na puedeng makafiansa an acusado nin P120,000 sa 3 counts na caso. An acusado na iyo an presidente kan korporasyon nadakop sa saiyang pigtataguan na sadit na Carenderia sa Barangay Obaliw, Polangui, Albay mga bandang alas 1:30 nin hapon kan Martes, Abril 17 kan pinagsarong fuersa kan CIDG Camarines Sur na pinangenotan ni Chief Inspector Ronie Fabia, CIDG Bikol asin miembros kan PNP sa Albay. An saiyang kaibanan na kasaroan na igwa na sindang tres años na aking babae dai naman inarestar mantang dai kabali sa asunto alagad an saiyang enot na esposa na si Maria Cynthia an padagos pang nagtatago sa awtoridad huli ta kabali sa mga kasosyo. Si Agnabo, dating nagtrabajo bilang seaman sa laog nin veinte tres años alagad naglaog sa investment scam na saiyang binabasol an orihinal niyang esposa. Inako kaini sa CIDG na aram niyang tambak an saiyang caso na ano man na oras puedeng arestaron. Siya detinido na ngonian sa Bureau of Jail Management and Penology sa Barangay Del Rosario, Ciudad nin Naga. An acusado bayawon ni dipuntong Nestor Avenido, dating Consejal kan Magarao, Camarines Sur na binawian nan in buhay na dating nakadetiner sa Tinangis Provincial Jail sa Pili, Camarines Sur. Si Avenido dating envuelto man sa investment scam. An investment scam kan RAL na rehistrado sa Security and Exchange Corporation (SEC) namay Company Registration NO. CS201329303 asin an certificate of incorporation pig-isyu ni Director Maylou Duka-Castillo kan Febrero 25, 2013 asin may address sa Barangay Cadlan, Pili, Camarines Sur. Kabali sa incorporators iyo sinda Maria Cynthia Agnabo na may address sa 0601 Tremezzo Ave. Camella Subd., Del Rosario, Ciudad nin Naga an saindang aki na si Wayan Christopher Agnabo, kan kaparejong pigeestaran; Prescilla Roco kan 47-Belen St. Gulod, Novaliches, Ciudad nin Quezon; Rosalinda Roco kan 348 Topsite Townsite, Mariveles, Bataan; Maria Ana Imperial kan Banasi, Bula, Camarines Sur asin Sesylx A. Pena kan Pamon Subd., Palestina, Pili, Camarines Sur. (dpa)