Protect VP Leni, kurahaw sa ginibong rally sa Naga

Maabot sa tres mil an nagparticipar sa prayer rally asin noise barrage na ginibo sa Plaza Queson, Ciudad nin Naga kasobangui na pinangenotan kan civil society group sa isyu kan nagpapadagos na protesta ni dating Senador Bong-Bong Marcos sa Presidential Electoral Tribunal (PET) contra sa kapanganahan ni Bise Presidente Leni Robredo. Nagkaigwa muna nin misa sa Metropollitan Cathedral antes kan saindang rally na may titutolong Stand with VP Leni Fight for Independent Judiciary. An mga lider kan manlaen-laen nin sektores gikan sa limang congressional district kan Camarines Sur iyo an tinawan dalan nganing magpahayag kan saindang sentimiento asin suporta sa Bikolanang bise presidente. Saro sa nagtaram sa entablado an lider kan Lalaki Laban sa Karahasan asin an saindang kurahaw ‘’An balota hali sa Comelec Camarines Sur pag-abot sa Manila basa, wow magic’’. Sinda nagtutubod na mayong nangyaring darayaan sa resulta kan eleksyon sa Camarines Sur asin mismo an votantes iyo an makakatestigos kan malinig asin matuninong na pirilian sa provincia. Sa entrevista kan Bicol Mail ki Bise Alcalde Boy Franco kan Pamplona, Camarines Sur na nag-aatendir sa rally, sinabi kaini na dapat irespeto ni Marcos an desisyon kan tawo mantang an Camarines Sur aram kan gabos na balwarte ni Robredo bilang sarong Bicolana asin tubong Ciudad nin Naga. Sinabi man ni Consejal Jun Lavadia kan makaolay kan Bicol Mail, an sadiring iniciativo kan civil society group nagpapahiling na dapat surogon kan tawo an tama asin nangngdie na ipasunod sana kan PET an pinaglalaban na ‘’independent judiciary’’. Tinawan sanang opurtunidad na makataram iyo an mga lider kan manlaen-laen na sektores asin paradalan na sana an mga politico. Presente sa rally an mga opisyales lokal kan City Hall, opisyales de barangay kan ciudad asin sa iba pang mga banwaan. (dpa)