Bordado nagtahaw na sa isyu sa Sitio Caorasan

Pili, Camarines Sur – Nagtahaw na si Congresista Gabriel H. Bordado Jr. kan tercer distrito kan Camarines Sur na dapat magkaigwa nin diyalogo kan grupo nin mga paraoma na apektado kan re-orientation project sa Naga Airport na dapat yaon an presencia nin mga congresista kan Camarines Sur, LGU Pili, Capitolyo Provincial asin iba pang stakeholders nganing resolberan an controvercia sa neutral na lugar asin pangenotan ni Presidential Adviser for Bicol Affairs Marvel Clavecilla nganing mayong masabi na may political bias. Si Bordado, nag-atubang kasoodmang aga sa mga lideres asin miembros kan grupo nin paraoma sa lugar mismo kan Sitio Caorasan, Brgy. San Agustin, Pili, Camarines Sur na nagkaigwa sinda nin sarong oras na diyalogo na yaon an presencia ni Alcalde Tomas Bongalonta. Saiyang dinangog an voces kan sektor nin paraoma na pinangenotan ni Artemio Sanchez na nagluluwas sa saindang mga reclamo na mayong consultasyon na ginibo an gobierno provincial kan Camarines Sur maging an Department of Transportation (DOTr), huli ta dai lamang sinda nakarecibe nin surat na tatamaan sinda kan proyecto sa aeropuerto an mahiwas na kaomahan sa Brgy. San Agustin. Nabigla sana an mga residentes kan Sitio Caorasan kan magralaog an mga truck kan Capitolyo Provincial, mga alas 4:00 nin aga kan nakaaging semana asin pigtarambakan nin daga an tinampo na enterong paralisado si viaje kan motorista asin mayong makalaog na residentes sa Sitio Caorasan na apektado an maabot sa 247 kaharongan, sabi sa mga pahayag ninda Mrs. Nenita Petallano, Ryan Unidas asin iba pang nagvoces kan saindng kaangotan sa provincia. Pinaliwanag man ni Bordado an mayor na katuyohan kan DOTr sa re-orientation project kan aeropuerto na papakinabangan kan mga taga Camarines Sur alagad kun igwang isyu dapat paagihon sa matuninong na orolay asin magkaigwa liwat nin diyalogo na aatendiran kan mga stakeholders. Naging cuetionable sa apektadong residentes an ginibo kan Task Force Sagip Kalikasan na nakatakop an saindang lalawgon kan laogon an saindang lugar asin tano ta an pagtambak nin daga ginibo alas 4:00 nin agang amay. An congresista pinaaram sa grupo nin paraoma bilang representante sa Bicol ni Presidente Rodrigo Duterte si PABA Clavecilla na iyo an dapat magtahaw sa liwat na gigibohon na diyalogo na pig-recomendar gibohon sa neutral na lugar sa Ateneo de Naga University, nag-uyon na an grupo nin paraoma nganing resolberan an isyu. An grupo igwa nang ginibong barikada palaog sa Sitio nganing ulangon an arin man na maprobar na tambangan nin daga an saindang tinampo asin lugar na mayong tamang consultasyon. An kariribokan sa Sitio Caorasan iyo naman an mainit na pasimbagan sa mga estasyones nin radyo ninda Congresista LRay Villafuerte kan segundo distrito asin Congresista Rolando Andaya Jr kan premir distrito asin nagsurog naman si dating Diputado Luis Villafuerte sa mag-amang LRay asin Gobernador Migz Villafuerte. PABA CLAVECILLA KINAOLAY NI BORDADO SA TELELPONO Mga alas 11:30 nin aga kasoodmang Miercules matapos kan ginibong diyalogo ni Bordado sa mga paraoma, kinaolay kan diputado si PABA Clavecilla nganing iyo an mangenotan sa orolay sa controvercia alagad nagsabi an dating RTC Judge na halat-halaton muna an resulta kan caso sa expropriation case sa corte na magkakaigwang vista hapon kan kaparejong aldaw antes sinda magtalaan nin diyalogo. Nag-uyon digdi si Bordado na halaton muna na matapos an pendienteng caso sa jusgado mantang nagpahayag man si PABA Clavecilla na andam siyang magtabang huli ta pigmamawot kaini na maparikas na an proyecto sa re-orientation kan Naga Airport. Tolong taon na an nakakaagi kan magkaigwa nin diyalogo an mga stakeholders na ginibo sa Ateneo de Naga University na an pig-orolayan iyo an proyecto sa Naga Airport na kun igwang apektadong sektor ipaaraman an proyecto sa paagi nin consultasyon. An re-orientation project pigtagamahan nin fondo nin P3.53 bilyon sa panahon kan dating administrasyon ni Presidente Aquino alagad dai tolos na-implementar huli kan halawig na mga proceso sa DOTr asin CAAP. (DPA)