Koleksyon kan RDO 65 apektado kan Train law

Naghuros sa P100 milyon an target collection kan Revenue District Office No. 65 kan Bureau of Internal Revenue (BIR) sa Ciudad nin Naga epekto kan pig-iimplementar na Train Law. Sinabi ni Leticia Arabit bagong pamayo kan RDO 65 na kun dai pa na-iimplementar an Train Law saindang target collection ngonian na taon 2018 nagcacantidad P1.4 bilyon alagad binaba kan saindang ahencia sa P1.3 bilyon o nagbaba nin P100 milyon. Mayo sa kontrol kan saindang opisina an koleksyon sa Train Law matapos halian na nin obligasyon sa withholding tax an mga empleados kan gobierno asin sa pribadong sektor na nagrerecibe nin hababa sa P250 mil sa bilog na taon. Saro sa dakulang pigsasakduhan nin bilyones pesos na koleksyon sa withholding tax iyo an mga empleados asin paratukdo kan Departamento de Edukasyon asin empleados kan LGU asin iba pang ahencias de gobierno, sabi pa ni Arabit. Sinabi pa kan RDO Officer tanganing makua ninda an target goal na P1.4 bilyon ngonian na 2018 saindang estrictong iimplementar an pagkolecta nin buwis para magcomple kan saindang obligasyon maging kan paglapag kan mga paradulag na magbayad nin buwis kabali na digdi an pag-implementar kan Oplan Kandato sa mga negociante na madayang magbayad kan saindang obligasyon sa gobierno. Si Arabit, dating assistant RDO sa Manila alagad nadestino siya sa Ciudad nin Naga kan Enero 8, 2018 na pig-promote bilang pamayo kan RDO 65, alagad sa isyu kan posibleng i-apon siya sa ibang provincia kun dai makua an target goal mayo man nin problema. An RDO No. 65 sakop an Naga asin mga banwaan sa primer, segundo asin tercer distrito kan Camarines Sur. Alagad kun ‘’justifiable’’ dai makua an target goal maiintindihan man ini kan saindang commissioner asin magpapadagos siya digdi sa Ciudad nin Naga, sabi pa. Kan nakaaging mga administrasyon saro sa pulisya kan BIR kun an sarong RDO Officer dai nakukua an pigtalaan na target goal asin maluya an performance kabali sa mga candidato nganing halion sa saindang presenting posisyon asin dapat idestino sa ibang ciudad o provincia. (dpaureus)