Sarong PB nasa listahan kan PDEA pigprobaran nang dakop

Saro sanang Punong Barangay (PB) sa Camarines Sur sa limang pigngaranan kan Philippine Drug Enforcement Agency (PDEA) na envuelto sa ilegal na droga na dati nang pigprobaran na dakopon kan mga awtoridad na armado nin mandamiento de rekisa alagad nakadulag envez an saiyang tugang na lalaki iyo an nabadil gadan kan raiding team. An PB nginaranan kan PDEA na si Oriel Legaspi kan Barangay Peñafrancia, Del Gallego sakop kan premir distrito kan Camarines Sur asin liwat nagcacandidato sa maabot na sarabay na Barangay asin Sangguniang Kabataan elections sa Mayo 14. Apat man na mga barangay kagawad an nginaranan na sinda Ariel Torres Mirabuena kan Barangay Cabuyao, Sipocot na dati nang nadakop kan PDEA asin PNP asin nag-aatubang na nin caso sa pagbalga kan Acta Republika 9136 o mas midmid sa Comprehensive Dangerous Drugs Act of 2002. Si Cabuyao PB Edwin Rey nagkumfirmar na nadakop na sa ilegal na droga an sinambit na barangay kagawad na saiyang pig-osipon na marhay man na tawo asin magserbe sa saindang habitanes. Kabali pa sa listahan iyo si Neptali Maposao kan Poblacion, Siruma; Natividad Francia Bombita kan Brgy. Sugod, Tinambac asin Charlie Padernal Parpan kan Brgy. Bagumbayan Pequeño, Goa. Alagad sinabi ni Punong Barangay Agnes Pasiona kan Bagumbayan Pequeño an sinambit barangay kagawad dai naman nagcandidato sa maabot na pirilian mantang nagdemiter na ini sa puesto kan Enero 2018. Sa pinaluwas na listahan kan PDEA igwang total na 270 hali sa mga barangay sa nasyon asin an setenta (70) kaini hali sa rehiyon Bikol na iyo an may halangkaw na listahan kun icocompara sa ibang mga rehiyon. An Albay iyo an nangengenotan na igwang 21 Punong Barangay asin 29 barangay kagawad; Sorsogon – 2 PB asin 5 barangay kagawad; Camarines Sur – 1 Punong Barangay asin 4 na barangay kagawad asin Masbate – 1 PB asin 2 brgy. kagawad. Sa DILG Bikol, sinabi ni Director Elouisa Pastor na bakong tama an listahan na pinaluwas kan PDEA huli ta sa mga pigngaranan igwang dai na sa posisyon, igwang kinasohan asin nalalaoman sa carcel sa caso sa ilegal na droga. Sinabi kan PDEA Bikol na katuyohan kan saindang ahencia na iluwas an mga pangaran kan mga envuelto sa droga nganing dai na sinda ivoto sa maabot na Barangay asin Sangguniang Kabataan elections sa Mayo 14. Alagad igwang nagrereclamong opisyales de barangay na inocente sinda sa acusasyon kan PDEA. (DPA)