CamSur may pinakalangkaw benipisaryo kan ESA sa Bikol

An Camarines Sur na nag-aatubang nin isyu sa epal na envuelto an nagkaperang mga politico sa pagdistribuer kan Emergency Shelter Assistance (ESA) kan DSWD iyo an may halangkaw na numero nin mga benipisaryo sa tolong provincia sa Bikol kumpara sa Albay asin Catanduanes base sa listahan kan ahencia matapos kan paglamasa ni bagyong Nina kan Deciembre 2016 na sagcod sa ngonian dai pa natatapos an pagdistribuer kan ayuda sa mga biktima kan calamidad. Sa pinaluwas na listahan kan opisina rehiyonal sa pamamayo ni Regional Director Arnel Garcia sa partially asin totally damaged, an Camarines Sur igwang 130,650; Albay – 38,833; asin Catanduanes – 22 – 22,866 na igwang kagabsan na funding assistant nagcacantidad nin P3.7 bilyon alagad maabot pa sana sa P870 milyon an pinapaluwas na fondo sa apektadong mga provincia. Sa partially damaged na mga harong sa Camarines Sur igwang total na 100,736; Albay – 24,711; asin Catanduanes – 16,338. Sa totally damaged – Camarines Sur – 29,914; Albay – 14,122; asin Catanduanes – 6,528. Inabot na nin duwang taon dai matapos-tapos kan DSWD an pagdistribuer kan ESA alagad pinaliwanag ni Garcia na nagdedefende sinda sa pigpapadarang fondo hali sa saindang opisina central kun pera man an pig-download sa saindang opisina sainda man tolos pigpapadara sa LGUs na iyo an natao kan ayuda sa rinibong benipisaryo. An ESA hali sa fondo kan DSWD bako kan arin man na LGUs alagad an ibang mga politico mientras na nagrarani na election period sa 2019 nag-eepal sa pagdistribuer kaini. Daing controvercia sa isyu nin ‘’Epal’’ sa Albay asin Catanduanes, alagad nangyayari sana sa Camarines Sur, sabi pa kan DSWD. An DSWD dati nang nagcampaña kan mga nakaaging eleksyon laban sa ibang mga politico na nag-eepal sa 4Ps asin liwat sindang nagpapatanid sa mga opisyales lokal na nagiging opurtinista sa pagdistribuer sa mga pobreng benipisaryo na ginagamit sa politica. An mga partially damaged na harong magrerecibe nin diez mil pesos asin treinta mil pesos sa mga totally damaged na harong.