CASO SA MARIANO VS CITY HALL: Desisyon kan Corte Suprema nakakamundo - VP Robredo

Kun an sabi kan City Hall ‘‘Manindugan: Harong kan Namamanuan Proteheran’’, si Bise Presidente Leni Robredo nagpahayag nakakamundo an naging desisyon kan Corte Suprema na kaparejo man sa pagpatalsik sa Jefe Magistrado Maria Lourdes Sereno. Alagad dai pa nahahalian nin paglaum an bise presidente huli ta puede pang magsangat nin motion for reconsideration an ciudad sa caso civil na Mariano, et al bilang petitioners vs City Hall. respondent Haloy nang pinaglaban kan lokal na gobierno an caso alagad igwang mga paghadit na mapahali an City Hall o kun dai man magbayad nin arkila na nagcacantidad nin P255 milyon na hali sa buwis kan namamanuan kan ciudad, sabi pa ni Robredo. Naglalaum siya sa lokal na gobierno kan ciudad na gigibohon an gabos nganing makua man giraray an paborableng desisyon. Envuelto an cinco hektaryang lote na bako lang City Hall an apektado envez kabali digdi an Hall of Justice, City asin Provincial Prosecutors Office kan Camarines Sur, National Bureau of Investigation, PAO Office, City Civic Center, IBP bldg. asin iba pang edificio na decada nang napatindog. An City Hall pinagibo kan taon 1959, na ngonian pigmimid bilang center of good governance kan nasyon alagad nagkakaigwang controvercia sa propriedad. Sa desisyon kan 1st Division kan Corte Suprema pinapabayad an City Hall nin bulanan na arkila na P1.25 milyon poon kan taon 2003 hasta ngonian na taon na igwang total na P255 milyon. Sinabi ni Alcalde John Bongat na mayo kan sinambit na dakulang cantidad an ciudad mientras na nakatagama na sa 30 years sustainable development plan. An envueltong propriedad pigpahayag na pigdonar ninda dipuntong Macario Mariano asin Jose Gimenez. Naging ponente kan desisyon iyo an Bikolanong SC Justice Noel Gimenez Tijam na nag-estar asin nagklase nin elementarya asin segundarya sa Ciudad nin Naga. An copya kan desisyon narecibe kan Abril 24, 2018 asin nagplantiar na nin MR an lokal na gobierno kan ciudad na afuera kan City Legal Officer nagkua pang abogado hali sa Manila. (dpa)