Nagpasumpa ki Leni, gana nin sarong voto

Calabanga, Camarines Sur – An premirong barangay kapitan na nagpasumpa sa ika-duwang pamayo kan Republika kan Filipinas liwat nanggana sa nagtapos na Barangay asin SK elections kan May 14 alagad nakalamang sana nin sarong voto sa saiyang kalaban. Si Brgy. Kapitan Rolando Coner kan Bgry. Punta Tarawal, pinakasadit na barangay sa banwaan nin Calabanga nagsabi na naging mainit an saindang ralaban sa nagtapos na pirilian kan saiyang daogon nin sarong voto si Rolando Sarcon. An nadaog na candidato dai paman nagkumfirmar kun plano kaini na magpa-recount kan resulta sa pirilian sa saindang barangay. Sa saiyang mga platika sa panahon nin campaign period sa saindang lugar pig-orgullo kaini sa mga residentes na siya an premirong Kapitan na nagpasumpa sa ika-duwang pamayo kan nasyon na si Bise Presidente Leni G. Robredo afuera kan saiyang naconsiger na mga proyecto sa laog nin limang taon. Alagad dai ini naging basehan nganing saiyang ilampaso sa pirilian an naging kalaban sa puestong barangay kapitan. Nagpahayag na nin pasasalamat sa constituentes kan barangay si Coner matapos na siya an ideclara bilang ganador sa nagtapos na pirilian sa barngay. Si Coner kaibanan si Barangay Kapitan Regina San Miguel kan Barangay Mariana, Ciudad nin Quezon iyo an nagpasumpa ki Bise Presidente Robredo kan Hunyo 30, 2016 na ginibo sa Quezon City Reception Hall. Sa sinambit na actividad pig-atendiran kan Team Naga sa pamamayo ni Alcalde John Bongat asin iba pang mga Bikolano na hali sa barangay asin iba pang sektores.