Expanded wheelclamp ordinance aprobado na: Triple madadakop aroaldaw - PSO

Puedeng ma-triple kan Public Safety Office kan City Hall an tatamaan na mga vehiculo kan expanded wheelclamp ordinance oras na maging epektibo ini asin estrictong iimplementar sa masunod na duwang bulan alagad sa ordinansa kabali an towing equipment na mabutong sa mga pig-abandunar asin ilegal na pakagarajing vehiculo nganing mahiwas an tinampo. Ini an mga pahayag sa Bicol Mail ni Rene Gumba, jefe kan PSO matapos maaprobaran sa sesyon regular kan Sangguniang Panlungsod sa pamamayo ni Bise Alcalde Nelson Legacion kan Martes, Mayo 22 an expanded wheelclamp ordinance asin kasabay na digdi iyo an towing sa mga pig-abandonar asin ilegal naka-garajing mga vehiculo. Aroaldaw inaabot sa sampulong mga vehiculo an tinatamaan kan wheelclamp ordinance sa commercial district 1 kan ciudad huli kan pagsinutil kan ibang pasaway na chofer alagad piglalaoman na magiging triple o treintang (30) mga vehiculo aroaldaw oras na estrictong iimplementar an expanded wheelclamp ordinance. Pinapamulta nin P600 an chofer o kagsadiri kan sasakyan na nagsisinutil sa ordinansa, sabi pa ni Gumba. Hinagad ni Gumba sa mga maysadiri nin vehiculo na magsunod sana sa ley trafico nganing mayong problema alagad apesar kan ordinansa dakul pa an mga nagsisinutil, huli kaini nagtutubod an PSO na pueding maging triple an saindang madadakop aroaldaw na aaboton nin 900 na mga vehiculo cada bulan. Sa amended ordinance, nagluwas na sa commercial district an wheelclamp area asin kabali na an mga lugar kan General Luna St., sa wala hali sa canto kan dating advent cinema sundo sa Naga City Police Station; Bicol Medical Center road hali sa may BIR na sakop kan fire lane kan Bureau of Fire Protection sundo sa canto kan Panganiban St.; Ateneo Avenue hali sa Parochial School asin hali sa USI pasiring sa Naga Central School l. Si Consejal Joselito Del Rosario, dating jefe kan PSO kan City Hall asin pamayo kan Committee on Public Utility kan consejo iyo an nangenotan sa pagpadreno kan sinambit na ordinansa na mayong nagcontrang miembros maging kan mga nakatukaw na City Youth Councilors. Nag-agi sa mga public hearing sa manlaen-laen na sektores asin pag-aadal nin nagkaperang bulan kan komite antes na-aprobaran sa en banc session. An ordinansa nagtataong duwang bulan sa jefe ejecutivo kan ciudad nganing iimplementar ini, asin dapat maghanap nin towing company na igwang mahiwas na lote na gigibohon na impounding area kan mga mabubutong na vehiculos. Alagad kun mayong towing company an lokal na gobierno sa paagi kan PSO iyo an awtorisado na magbutong kan mga ilegal nakaparadang vehiculos, sabi sa ordinansa. Cantidad P1,400 an multa alagad an setenta por ciento digdi madalagan sa bulsa kan operator kan towing company. Admitido kan consejal na bakong perpekto an enmiendadong ordinansa mantang andam an sangguniang sa pagretoke kaini kun kinakaipuhan, sabi pa ni Del Rosario. An ordinansa nag-aalok man sa mga kagsadiring vacanteng pribadong lote na gibohon na parking area na tinutogotan sinda na magsingil nin bayad. (dpa)