Libreng Wi-Fi internet access piglansar sa Camarines Sur

Pili, Camarines Sur - Piglansar na kan Department of Information and Communications Technology (DICT) sa Camarines Sur an libreng Wi-Fi Internet Access sa mga pampublikong lugar na ginibo kan Mayo 21, 2018 sa Capitol Convention Center sa banwaan na ini. An proyecto katuwang an gobierno provincial kan Camarines Sur nganing pahiwason asin dakul an makinabangan kan interconnectivity sa publiko na libre. An programa pinangenotan ninda DICT Assistant Secretary Alan Silor, Enrico Toledo, Project Manager kan DICT asin Gobernador Migz Villafuerte asin an actividad sinabay sa 2018 Kaogma Festival kan provincia. Sa press conference, sinabi ni Silor an Phase 1 kan proyecto pig-enot an 3rd asin 6th class municipalities na kinababalihan kan Baao, Balatan, Bato, Cabusao, Camaligan, Del Gallego, Garchitorena, Lupi, Magarao, Milaor, Minalabac, Pamplona, Pasaca, Presentacion, San Fernando, San Jose, Sagnay, Tigaon asin kaayon na an Pili na iyo an kabesira kan provincia. ‘’Unlimited’’ sa oras asin 24/7 sa gabos na mga naggagaramit, alagad limitado sana sa 500 metros an radius kaini hali sa access point. Ibubugtak an libreng Wi-Fi internet access sa mga Plaza asin sa iba pang mga pampublikong lugar na igwang speed na 2 Gb, sabi pa kan DICT. An Pipol Konek Free Wi-Fi Internet Access sa mga pampublikong lugar sarong proyecto kan DICT na may katuyohan ihatod an internet connectivity sa lambang Filipino. Sa paagi nin pagpatindog nin 13,000 Free Wi-Fi Hotspots, bilang pag-implementar kan Free Internet Access Act (RA 10629) kan gobierno sa gabos na mga pampublikong lugar. An proyecto narealisar kasunod kan advocacia ni Gobernador Villafuerte nganing mapakusog an interconnectivity kan provincia. An provincia nag-implementar na kan libreng Wi-Fi project sa Iriga City Park, Nabua Public Market, asin 88 escuelas publica sa mga lugar kan Pili, Bula, Minalabac, asin Milaor kan nakaaging 2016 sa paagi kan Information and Communications, Archives, and Records Management Office. An ahencia nagbugtak nin temporaryong opisina provincial sa Camaligan, Camarines Sur kataid kan munisipyo kan LGU Camaligan. (dpa)