SA RELOKASYON KAN MGA ELECTRICAL POST: P9.2M cuentada kan PW iyo an masusunod - DOE

Pinaboran kan Department of Energy (DOE) an cuentada kan 2nd Engineering District kan DPWH sa Baras, Canaman, Camarines Sur sa relokasyon kan mga electrical post kan Camarines Sur II Electric Cooperative (Casureco II) na ulang sa tinampo sa pig-iimplementar na road widening project kan obras publika sa Ciudad nin Naga. Sa pinaluwas na opinyon asin posisyon kan DOE na firmado ni Secretaryo Alfonso Cusi, tama an cuentada kan 2nd Engineering District kan DPWH sa pamamayo ni District Engr. Rebecca Roces na nagcacantidad nin P9.2 milyon compara sa Casureco II na halangkawon si cuentada na nag-aabot sa P16.8 milyon. An posisyon kan DOE na petsado Abril 17, pinadara ki Administrator Edgardo Masongsong kan National Electrification Administration na piglilinaw na nagsunod an DPWH Bicol sa formula base sa seksyon 5 asin seksyon 10 sa Joint Circular No. 1 kan DOE asin DPWH serye kan 2017. Kinumfirmar ni Assistant District Engr. Richard Ragrario kan 2nd Engineering District na sainda nang narecibe an kopya kan surat kan Mayo 15, 2018 hali sa DOE asin copy furnished si P/S General Manager Nelson Lalas kan Casureco II. Sinugo na kan DOE an NEA na gibohon na an aksyon base sa saindang panindugan na nagsunod an obras publika sa tamang formula base sa Joint Circular nganing ma-implementar na an relokasyon kan mga electrical post sa Ciudad nin Naga. Naabala an relokasyon kan mga poste huli kan pakikipag-tagasan ni Lalas sa DPWH na dapat masunod an cuentada na mas halangkaw nin siete milyon pesos. Alagad sinabi ni Ragragio na nagsunod sana sinda sa formula kan Joint Circular sagcod na saindang pigcuestion an halangkaw na computation kan cooperativa nin electridicidad. Nganing resolberan an conflicto sa isyu sa tamang formula pigdara sa atensyon kan Legal Department kan DOE asin sa ngonian binaba na an opinyon pabor sa DPWH, sabi pa ni Ragragio. Dai na nag-uuyon an City Hall sa panindugan ni Lalas sagcod na-aabala an proyecto kan DPWH huli ta delicado an mga electrical post sa mga aksidente sa motorista sa mga pinahiwas na tinampo, nagdesisyon an Sangguniang Panlungsod sa pamamayo ni Bise Alcalde Nelson Legacion na magpasar nin resolucion nganing huroton sa NEA na ribayan na an nakatukaw na PS/AGM kan cooperativa. (dpa)