10 mga nanggana sa SK election madidiscalifar

Sampulong mga nanggana sa Sangguniang Kabataan (SK) election sa Ciudad nin Naga dawa pinatanidan na kan Commission on Election na isibog na an saindang candidatura huli ta over age na o nag-eedad na nin labi sa veinte cuatro (24) años nagpadagos pa kan saindang candidatura asin piglalaoman na madidiscalificar man giraray na makatukaw sa saindang puesto. Dai na muna nginaranan kan Comelec Naga, alagad kinumfirmar ni Abogado Maico Julia Jr. Election Office kan ciudad na sinda kabali sa veinte uno (21) nagpadagos kan saindang candidatura sa nagtapos na Barangay asin SK Elections na naghahalat ngonian kan ipapaliwus na desisyon kan Legal Department kan Comelec Central Office. Sa sampulong over age na saro digdi nanggana bilang SK chairman asin an siyam mga SK Councilors. An saindang mga pangaran yaon na sa opisina ni Abogado Maria Norina Tengaro-Casingal kan Legal Department kan commission alagad huli ta bako lang digdi sa Ciudad nin Naga an parejong isyu envez poon sa Luzon, Visayas asin Mindanao dai tolos makapaluwas nin desisyon. Piglinaw kan Comelec na dawa sinda gana sa pirilian asin pig-proclamar na bilang mga ganador alagad kun ibaba na an desisyon dai man sana sinda papatukawon. Napag-araman pa na si over age na SK chairman elect nakaboto pa sa ginibong SK federation election sa Ciudad nin Naga kan Mayo 28. An SK chairman na madidiscalificar riribayan kan may pinakalangkaw na voto napiling SK councilor, sabi pa kan Comelec. Sinabi kan Comelec na base sa SK Reform Act an nag-eedad sana 18 hasta 24 iyo an calificado na magcandidato mantang si 15 hasta 17 años puedeng mag-voto alagad dai puedeng votohan. An nag-eedad nin 18 hasta 30 años iyo an calificado na magvoto. An Comelec nagrecibe sana kan mga nagpaplantiar nin certifico de candidatura alagad mayo sa saindang jurisdiksyon na magdiscalificar nin arin man na candidato mantang malinaw sa probisyon kan SK Reform Act an mga nag-eedad sana nin 18 hasta 24 años iyo an calificadong magcandidato. (dpa)