PATANID SA PUBLIKO: Dayuhan na salisi gang nangbibiktima sa Naga

An Naga City Police Office asin City Hall nagpatanid sa publiko na maglikay sa dayuhan na organisadong salisi gang na an modus operandi an saindang operasyon sa mga mall asin sa restaurant asin an grupo anom na nag-eeribahan duwang babae asin apat na lalaki na pigkakarkulong nag-eedad nin 45 hasta labi sa 50 años. An grupo hali sa Manila, mga professional na sa ngaran na pagsalisi hali palang sa saindang operasyon sa Ciudad nin Lucena, Daet, Camarines Norte asin yaon na sa Ciudad nin Naga na pigtutubodan mabalyo naman nin lugar. Sinda Alcalde John Bongat asin Police Supt. Pedro Rafael Jr., jefe kan Sub Station 2 kan Naga City Police Office nag-atubang sa press conference na ginibo sa Blue Room kan Lunes na aga, Mayo 28, 2018 nganing saindang ipaabot sa publiko na nakalaog na sa Naga an dayuhan na salisi gang na igwa nang na-biktima sa sarong dakulang mall sa ciudad. Sinugo na kan jefe ejecutivo si P/Sr. Supt. Jonathan Panganiban, City Director kan NCPO na nahapon an mga suspechado nganing mayo nang isunod na mabiktima sa ciudad. An nabiktima sa sarong mall sa Ciudad nin Lucena taga digdi sa Ciudad nin Naga asin an grupo nagbalyo na kan saindang operasyon digdi sa ciudad. Pinaheling sa miembros kan media an CCTV footage kun pano si ginibong modus operandi sa pagsalisi sa bag kan kustomer. Pighahanteng kan grupo an mga bag kan kustomer na yaon sa likodan kan tukawan mantang nagkakarakan an bibiktimahon, an saro iyo an nagkukua kan bag asin ipinapasa sa saro pang kaibanan na may darang jacket nganing iyo an gamiton na matahuban an hinabon na bag. Naheling sa footage na sarabay nagbuwat sa tukawan an tolong mga suspechado matapos makua an bag kaibanan an matabang babae. An branded bag may laog iphone, mga personal na kagamitan, alahas asin iba pa kabali na an cash na nag-aabot sa total na P90 mil. An operasyon kan salisi gang natukaw sa bakanteng tukawan alagad dai man nag-oorder nin kakanon envez nagmamasid sa kapaliboton kun siisay an puedeng biktimahon. Sa investigasyon kan Police Sub Station 2, sinabi ni P/Supt. Rafael an grupo anom na nag-iiribahan duwang babae mantang si ibang miembros kan gang iyo man an nagbabantay sa luwas. Afuera pa kaini igwa pang darang vehiculo na iyo an ginagamit sa pagbalyong ciudad o lugar. Nagpapadagos pa an investigasyon kan Naga PNP nganing madakop an grupo mantang pig-aaraman kun yaon pa sa ciudad nganing madakop. An grupo parejo si modus operandi sa sarong mall sa Ciudad nin Lucena na iyo man si ginibo sa Ciudad nin Naga kan Mayo 25, 2018 mala ngani otro aldaw nagprobar pang magsalisi sa sarong restaurant sa Magsaysay Ave. alagad nagpalyar matapos mahulog sa salog si kinukuang bag na naheling tolos kan kagsadiri. An ginigibo kan ciudad sa direktiva ni Alcalde Bongat sa Public Safety Office sa pamamayo ni Rene Gumba iyo an pagpaskil sa mga establisimiento de negocio kan mga retrato kan mga suspechado na nakua sa paagi nin CCTV footage kan sarong mall na dai na nginaranan. (dpa)