Acting mayor suspendido man nin tolong bulan

Libmanan, Camarines Sur – Mantang nagseserbe pa nin anom na bulan na suspension an alcalde sa banwaan na ini, pinaluwas na kan corte an tolong bulan na preventive suspension sa acting mayor digdi na nag-aatubang nin casong pagfalsificar nin documento publiko asin tinatawan nin quince diyas an opisina lokal kan Department of Interior and Local Government (DILG) na iimplementar an orden matapos marecibe an kopya kan desisyon. Si Bise Alcalde Rommel Bulaong na iyo an nagtutukaw bilang acting mayor sa laog nin anom na bulan poon kan Marso 2018 karibay kan suspendidong pang Alcalde Bernard Brioso huli sa caso administrativo, naghahalat na sana kun nuarin iimplementar kan DILG nganing ipasa na niya an posisyon sa nagtutukaw na Acting Vice Mayor Alexander Mendoza. Inako na ni Bulaong an desisyon kan corte petsado Hunyo 22 na pinaluwas kan Regional Trial Court Branch 56 sa sala ni Juez Manuel Salumbides mantang preventive suspension pa sana asin mahalat siya kan ano an magiging pinal na desisyon. Si dating Consejal Jose ‘’Nonoy’’ Dy asin pamayo kan Citizens Crime Watch sa Camarines Sur iyo an nagsangat nin casong pagfalsificar nin dokumento publiko contra sa acting mayor asin iba pang miembros kan Sangguniang Bayan na pendiente pa an caso sa ibang sala kan corte sa Libmanan. Naging ugat kan caso iyo soboot an nadiscobre ni Dy na naggaramit nin mga fekeng recibo an nagkaperang mga consejal na nagsasabi nag-atendir sa PCL Convention sa Boracay nganing pa-reimbursaran sa LGU. Kabale sa mga acusado digdi iyo sinda suspendidong Alcalde Bernard Brioso, consejal pa kaidto, Consejal Gerry Tendero asin iba pang envueltong consejal na an iba mayo na ngonian sa puesto sa LGU. An caso enot sinangat kan dating consejal sa Ombudsman, alagad si caso administrativo binasura mantang si kaso kriminal pigpadagos na binaba sa Regional Trial Court kan Hall of Justice sa banwaan nin Libmanan. Si Acting Vice Mayor Mendoza nagpahayag na nag-aandam na siya sa pagtukaw sa puesto sa tahaw kan kasiribotan kan opisyales lokal digdi sa nakatalaan na kapiestahan kan banwaan sa Hulyo 24-25. An matukaw man na Acting Vice Mayor iyo si Consejal Tendero na nag-ika duwang puesto sa walong elihidong consejales sa ginibong pirilian kan Mayo 2016.