LTFRB District Office hagad ibalik sa Naga


Igwa man sanang mahiwas asin dakulang opisina an Land Transportation Franchising and Regulatory Board (LTFRB) dapat mapakinabangan an edificio asin maserbihan an sektor nin transporte sa Ciudad nin Naga, Camarines Norte asin Camarines Sur alagad perang bulan nang sarado asin dai na nin transaksyon. Si Joel Pellogo, lider kan Condor-Piston sa Camarines Sur nangapodan sa LTFRB Bikol na dapat ibuelta na an regular na operasyon kan ahencia sa District Office na namumugtak harani sa City Hall kan Ciudad nin Naga nganing dai na magsuroksokan an may mga transaksyon sa opisina rehiyonal sa Ciudad nin Legaspi. An District Office sa Ciudad nin Naga narealisar kan panahon ni LTFRB Chairman James Jacob nganing magserbe para sa makua asin ma-renew nin franquicia kan mga pampasajerong vehiculos asin iba pang transaksyon para sa magkataid na provincia kan Camarines Sur asin Camarines Norte alagad sa paglaog kan presenting administrasyon haros abandonado na an opisina asin hinalian na nin personajes. Sinabi ni Pellogo dakulang desbentaje sa mga taga Camarines Sur asin Camarines Norte na dagdag gastos an magpasiring sa Ciudad nin Legaspi asin abala sa oras. An edificio pinatindog digdi kan gobierno para sa sinambit na katuyohan alagad dai na napapakinabangan. Sa ngonian an ika-tolong eskalon ginagamit kan City Legal Office kan City Hall asin napag-araman ki Presidential Adviser for Bicol Affairs, dating Juez Marvel Clavecilla mabugtak sinda kan saindang opisina sa sinambit na edificio. Kun an sektor nin transportante an hahapoton, sinabi ni Pellogo dapat ngani cada provincia magbugtak nin opisina nganing dai madificilan an may mga transaksyon na kaipuhan pang magdayo sa Ciudad nin Legaspi. Sinabi man ni Anthony Solano nagkaperang veces na siyang balik sa District Office nganing magpa-inspeksyon kan truck for hire kan saiyang operator antes maka-renew kan saindang franquicia alagad otro semana igwa nang noticia sa lanub na an gabos na transaksyon sa LTFRB Naga, gabos na sa opisina rehiyonal sa Legaspi. Naging operational an District Office kan panahon ni Regional Director Ruel Alsisto alagad matapos magretiro na ini labing duwang taon na an nakakaagi luway-luway nang napaparalisar an transaksyon sagcod na dagos nang kinandadohan.