Comelec igwang kondisyon sa mga satellite registrations

Bukas an Commission on Election (Comelec) sa mga inbistasyon kan arin barangay asin escuelahan o colegio nganing magconducir sinda nin satellite registration alagad igwa kondisyon na dapat ciertohon na igwang sangatos (100) na mga aplikanteng magpalista. Ini nganing dai masayang an saindang oras sa sarong barangay o escuelahan ta tibaad mas halaba pa an pila sa saindang opisina lokal, sabi ni Alexander Marpuri an opisyal na parataram kan Comelec Camarines Sur. Nagpoon na kan Hulyo 2 an continuing registration of voters hasta sa Septiembre 29, 2018 base sa pinaluwas na resolucion numerado 10392. Sa Ciudad nin Naga si enot na pagpalista sa mga votantes kan Hulyo 2 ginibo sa Naga College Foundation sa inbitasyon kan colegio nganing matawan panahon an mga estudiantes na magparehistro na nin amay sa Comelec para makaparticipar sa ehercisyo political sa nakatalaan na pirilian lokal sa Mayo 2019. An aplikasyon para sa mapalista, si mga transfer/transfer with reactivation, reactivation, change/correction of entries/and inclusion /reinstatement of records in the list of voters kinakaipuhan personal sindang magpalista sa oficina kan Election Officer kan ciudad o municipalidad. Sinabi pa kan Comelec Camarines Sur sa nakaaging Barangay asin Sangguniang Kabataan elections igwang total na 1,760,000 rehistradong votantes asin piglalaoman ini na malangkaw nin hasta sa tres por ciento. Huli ta natatapos palang si nakaaging continuing registration kan Noviembre 2017 asin duwang bulan sana an pagpalista piglalaoman na maabot sana sa 300 mil an dugang na votantes sa Camarines Sur sa maabot na pirilian lokal. Bukas an mga opisina kan Comelec sagcod aldaw nin Sabado maging fiesta opisyal nganing mag-ako kan mga mapalista nganing makaparticipar sa pirilian lokal sa Mayo 2019. Nagtutubod pa an commission na mayo nang mangyayaring pagpalawig kan continuing registration of voters mantang sa premirong semana kan Oktubre 2018 iyo na an pagplantiar nin certifico de candidatura kan mga macandidato sa masunod na taon. Sa Ciudad nin Naga, sinabi ni Election Office Maico Julia Jr. na halangkaw an numero kan mga nagpapalistang mga votantes mantang aram ninda limitado an aldaw kan continuing registration sundo sana sa Septiembre 29. Kan premirong aldaw maabot sa 80 an nagpalista asin sa ika-duwang aldaw nagabot sa 119 asin haros aroaldaw na an nagpipilang registrants na kadakle mga transferee, sabi pa ni Julia. Sinda kinakaipuhan magpresentar nin valid ID.