PROBLEMA SA BASURA SA CIUDAD NIN NAGA: Planong WEF liwat nabuhay

Piglalaoman na marerealisar man giraray sa Ciudad nin Naga an haloy nang pangiturogan na magkaigwa na digdi kan waste-to-energy facility (WEF) alagad arin man na proponente maagi man giraray sa proceso na dapat magiging ventaje sa lokal na gobierno. Walong taon na an nakakaagi, habo nang mangyari kan City Hall si nagpalyar na waste-to-energy facility kan C.G. Global Corporation, sabi ni Consejal Julian Lavadia Jr. Si Lavadia, miembro kan Committee on Environment sa Sangguniang Panlungsod kan Ciudad nin Naga nagbisita mismo sa lugar kan Waste-to-Energy Combustor Thermal Technology sa St. Mary AgriPower Assembly Plant sa Pennsylvania sa Estado Unidos asin naheling niya an operasyon kan facilidad sa basura na nacoconvertir sa energia na pueding i-adaptar sa Ciudad nin Naga. An AgriPower, sarong companiya na experto sa kaaraman sa teknolohiya sa WEF sa Estado Unidos naka-establiser na nin mga waste to energy facility sa maabot sa 60 lugar o ciudades sa USA nag-atubang na sa miembros kan Sangguniang Panlungsod sa ginibong sesyon regular kan Martes, Hulyo 3 nganing saindang ipaliwanag an propuestong proyecto na gagastosan nin P500 milyon. Nag-atubang sa SP iyo si Edgardo Rivera, opisyal na representante kan AgriPower na saiyang pigpaliwanag an proyecto na maocupar nin duwang hektarya na saiyang pig-orgulyo na sinda international standard asin compliance sa world climate change. Kun an Solid Waste Management Office (SWMO) kan lokal na gobierno nakakakolekta nin sagcod sa noventang (90) toneladang basura aroaldaw asin puedi ining maconvertir sa 1.2 megawatts na enerhia, sabi pa ni Rivera. Sa paliwanag kan representante kan AgriPower sa mapoproducir nin enerhia hale sa basura pueding magkaigwa nin ingreso an ciudad sagcod sa P50 milyon. Nagkaigwa nin mga kahapotan an mga miembros kan SP sa AgriPower sa teknolohia sa basura pasiring sa enerhia asin naging positibo sinda sa proyecto sagcod dagos nang nag-motion si Consejal Salvador Del Castillo na i-adaptar sa ciudad an Waste- to-Energy Combustor Thermal Technology asin nagsegundar an gabos na miembros kan consejo. Si Lavadia na hale sa Pennsylvania, USA asin naheling an lugar kan planta nagsabi na puedeng marealisar sa Ciudad nin Naga an sinambit na facilidad mantang saiyang nakahampang si mga opisyales kan companiya na pigpaliwanag sa saiya an ventaje kan waste to energy facility kan AgriPower. Napag-araman pa kan consejal na sarong bangko kan gobierno an nagtitiwala sa kakayahan kan AgriPower nganing pautangon nin fondo sa proyecto alagad kaipuhan na garantiyahan kan lokal na gobierno. Kun marealisar an facilidad sa enerhia an companya puedi pang magkolecta nin basura hali sa pagtaraid na banwaan kan ciudad nganing makaproducir pa nin dugang na megawatts envez kan target sanang 1.2 megawatts. Sinabi ni Bise Alcalde Nelson Legacion, pamayo kan SP prioridad pa kan City Hall an waste-to-energy facility dawa igwa nang pigpuponan na proyecto sa Sanitary Landfill sa Barangay San Isdiro. An facilidad ibubugtak sa laog kan diez hektaryang propriedad sa sinambit na barangay na sadiri na kan ciudad. Dai matapos-tapos an P260 milyon na proyecto sa Sanitary Landfill na perang taon nang pig-orolayan kan opisyales lokal nakadagdag si abalang pag-isyu nin ECC permit kan Department of Environment and Natural Resources. (DPA)