Problema sa trafico sa MTV Avenue, mababawasan na

Makakabawas sa hibog kan trafico sa M.T. Villanueva Ave. Ciudad nin Naga an concreto nang tinampo sa may linderos kan Brgy. San Felipe, Ciudad nin Naga asin Sta. Lucia, Magarao, Camarines Sur asin naghahalat nalang nin duwang semana nganing patagason an pinacemento na dating laboyan asin mapulot na tinampo. Si Consejal Vidal Castillo, pamayo kan Committee on Infrastructure sa Sangguniang Panlungsod kan ciudad nagsabi na labi sa P600,000 an ginastos kan lokal na gobierno kan maabot sa 80 metros na laba kan tinampo. Afuera kan MT Villanueva Ave. magiging magian na an bulos kan vehiculos sa Bagumbayan Norte asin Bagumbayan Sur. Dating pribadong lugar an lote na ginamit na kan ciudad para sa road right of way alagad dai tolos napaconcreto huli ta dai tolos nagtugot an may sadiri kan propriedad. Sinabi ni Castillo na si mga vehiculos na hali sa mga banwaan nin Magarao, Bombon asin Calabanga na dating nag-aagi sa Bagumbayan Norte, Bagumbayan Sur asin mabagtas sa MT Villanueva kun an saindang ruta pasiring sa Peñafrancia Ave., Magsaysay Ave., Basilica Minore Concepcion Pequeña asin Grande hasta sa Pili, Camarines Sur puede nang mag-agi sa Sta. Lucia-San Felipe mapapalipot pa an saindang viaje. Sa ngonian abala an dalagan kan trafico sa MT Villanueva Ave. mantang nagpapadagos na an ginigibong road widening project kan 2nd Engineering District, Department of Public Works and Highways. Abala an patrabajo kan obras publika huli kan mga ulang na poon kahoy asin poste kan Camarines Sur II Electric Cooperative (Casureco II) asin mga pribadong edificio na dai pa nagtutugot magpagaba sa laog kan road right of way. Sinabi pa kan pamayo kan Infrastructure Committee kabale sa saiyang pigtatawan prioridad an alternatibong ruta na maaging Calauag-San Felipe alagad dai pa maponan an proyecto mantang nagkapera pang pribadong propriedad igwa pang pendienteng expropriationg case sa corte alagad an iba nagtugot na agihan kan road right of way. Igwa nang tagamang P35 milyon na fondo an City Hall alagad igwa pang kaulangan an implementasyon huli sa isyu sa road right of way. Kun marealisar an bagong alternatibong ruta magiging magian na an bulos kan trafico sa MT Villanueva Avenue.