Mga dating PB pinatanidan kan DILG Bikol

An opisina rehiyonal kan Department of Interior and Local Government (DILG) nagpatanid na pueding sangatan nin caso kriminal an dating mga opisyales de barangay na nagtapos na kan saindang termino kan Hunyo 30 alagad sagcod sa ngonian padagos na nagiging sutil dai pang ginigibong turn-over kan mga propriedad asin documentos kan barangay sa bagong nagtukaw na Punong Barangay. Si DILG Regional Director Elouisa Pastor nag-orden sa mga provincial director kan saindang ahencia digdi sa Bikol aramon an listahan kan mga Punong Barangay na nagtapos na kan saindang termino alagad dai pa ipinapasa an mga propriedad asin documentos kan barangay apesar na dai pa ngani ginigibo si barangay asin SK elections nagcrear na nin Barangay Inventory Team (BIT). Tinawan pa sinda nin panahon hasta sa Hulyo 29 ngonian na taon na mag turn-over asin kun padagos pang magsisinutil caso kriminal an saindang aatubangon. An BIT nacrear base sa pinaluwas na Executive Order No. 2018-12 petsado Febrero 1, 2018 na nagsusugo sa pagbilog kan BIT nganing andaman an pag-turn over kan mga propriedad kan barangay sa bagong matukaw na opisyales de barangay. Imposibleng dai sinda nag-aaram mantang an komposisyon kan BIT kinababalihan kan punong barangay bilang chairman, sarong miembro kan barangay council bilang vice chairman asin mga miembros dapat igwang duwang miembros kan barangay council, tesurero kan brgy., sekretarya, asin municipal o city accountant, sarong NGO asin barangay record keeper. An osip sa ibang mga provincial director na dakul na mga dating punong barangay sa mga banwaan an sagcod sa ngonian dai pa nag-turned over sa bagong pamayo kan barangay asin iyo man an sombong sa mga opisina municipal kan DILG. An pag-implementar kan EO NO. 2018-12 nganing maseguro kan DILG na dapat ipasa kan paluwason nang PB an saindang babayaan na propriedad kan barangay. An lakdang na ini huli ta kan mga nakaaging taon kadakli kan mga nagpa-aram na sa serbisyong opisyales de barangay mayong ginibong turn over mala ngani igwang mga nawawarang documentos asin pagsasadiri an barangay an dai aram kun pinuli kan dating PB. Kun magiging estricto an DILG sa saindang patanid ginatos na mga dating PB an maatubang nin caso kriminal.