Naggadan sa alcalde kan Nueva Ecija, dakop sa CSur

Del Gallego, Camarines Sur –Sarong oras antes makatungtong sa PNP Provincial Office kan Camarines Sur an bagong Acting Regional Director kan Bikol P/Chief Superintendent Arnel Escobal natalikop sa banwaan na ini an duwang mga armadong suspechado na nagbadil gadan ki Alcalde Francisco Bote kan General Tinio, Nueva Ecija. Si Escobal nag-abot mga alas 10:00 nin aga sa PNP Camarines Sur sa Concepcion Grande, Ciudad nin Naga, pasado alas 9:00 nin aga kasoodmang Miercules, Hulyo 11 an duwang nadakop sinda Florencio Suarez, 48 años nagmamanijo kan gate away vehicle na Avanza may plaka PGO 134 asin an kaibanan kaini na si Roberto Gumacay, 36 años na pasiring kuta sa Masbate alagad nabagat sinda sa checkpoint sa Barangay Kabasag sa Andaya Highway sakop kan banwaan nin Del Gallego. Pinangenotan ni SPO4 Augusto Adolta, Deputy Chief of Police kan Del Gallego Municipal Police Station asin nakasunod man an miembros kan CIDG. Napag-araman sa ibang miembros kan MPS Del Gallego na inaagaw kan CIDG an credito sa pagkakadakop sa duwang suspechado mantang sinda mismo iyo an nakaarestar asin huri nang nag-abot an saindang grupo. An PNP Regional Command kan rehiyon tres iyo an nag-alerto sa PNP Quezon sagcod digdi sa Kabikolan mantang naglalapag an saindang grupo kan CIDG pasiring sa Camarines Sur, mga quince minutos matapos madakop an duwang mga suspechado nag-abot an mga awtoridad hali sa Nueva Ecija asin CamSur. Nakumfiscar sa mga suspechado iyo an dai licenciadong mga armas apat na kalibre 45, 9mm, riffle grenade, kalibre 22 asin kalibre 380. Si Provincial Director Sr.Supt. Jerry Beariz nagpalayog man nin komendasyon sa MPS Del Gallego mantang dakulang bagay na dai na pinalampas sa saindang area of responsibility nganing madakop tolos an duwang suspechado. Maogma si Acting Regional Director Escobal sa pagbisita niya sa Camarines Sur huli ta naarestar kan MPS Del Gallego an kriminal na naglaog digdi sa Bikol na tolos nasiog kan mga awtoridad sa paglaog sana sa sinambit na banwaan na nasa siete kilometros an distancia hali sa Tagkawayan, Quezon. Si Bote, iyo an nagsunod na alcalde sa Luzon na piglikidar perang aldaw sana matapos badilon gadan sa ginigibong flag raising ceremony si Alcalde Antonio Halili kan Ciudad nin Tanauan sa provincia ni Batangas. Siya lunad sa Toyota Fortuner kan pagbabadilon sa Ciudad nin Cabanatuan kan armadong kalalakihan kan Hulyo 3 matapos maghali sa opisina kan National Irrigation Administration. An duwang suspechado nakatalaan nang darahon sa Regional Command kan rehiyon tres mantang yaon sa saindang jurisdiksyon an inbestigasyon kan caso sa pambabadil sa jefe ejecutivo kan General Tinio, Nueva Ecija. (dpa)