SA BMC: Bordado: DOH kaipuhan magsumiter na kan budget para sa medical equipment

Si Congresista Gabriel H. Bordado Jr. kan tercer distrito kan Camarines Sur hinagad na sa Departamento de Salud (DOH) na isumiter na nin amay sa Congreso an saindang budget sa gagamiton na fondo nganing ibakal nin mga medical equipment na kaipuhan sa world class na walong escalon na edificio kan Bicol Medical Center. An congresista nakaolay si DOH Secretary Francisco Duque asin hinahagad kaini na dapat makaayon sa deliberasyon sa appropriation committee kan Camara-Baja an isusumiter an prosupuesto kan DOH para sa mga medical equipment kan BMC asin makabale ini sa 2019 national budget. Sinabi ni Bordado na naheling niya mismo an kamugtakan kan pigsasabing world class na edificio kan hospital alagad mayo man nin laog masasayang sana an fondo kan gobierno kun dai matatawan prioridad kan DOH na mafondohan sa badget nurong taon. An edificio pigbisita na ni Duque asin naheling niya na ‘’world class’’ alagad mayong mga facilidades asin medical equipment na kaipuhan kan sarong hospital. Hahalaton ninda na pakatapos kan State of the Nation Address (SONA) ni Presidente Rodrigo Duterte sa huring semana kan Hulyo 2018, magkakaigwang hearing an Appropriation Committee sa Camara-Baja asin saiyang hahagadon na dapat makalaog sa badget an mga kaipuhan na facilidades asin medical equipment kan BMC, sabi pa ni Bordado. An saro pang edificio na may limang escalon dai pang mga facilidades na pigprobaran nang gibohon si partial inauguration kan Emergency Room mga tolong semana an nakaagi alagad isinibog huli ta inabot nin tubig baha an groundfloor. Natuyawan ni dating Juez, Presidential Adviser for Bicol Affairs Marvel Clavecilla an limang escalon na edificio huli ta dai nadadapat ibugtak an Emergency Room sa 2nd floor envez dapat sa ground floor mantang digdi pigdadara an mga emergenciang pasyente. Walo, limang asin duwang edificiong escalon kan hospital pigfondohan kan nagtalikod na administrasyon ni Presidente Benigno Aquino III nin maabot sa on bilyon peso.