Ganador sa pirilian sa Liga kaalyado ni Migz

Kaalyado ni Gobernador Migz Villafuerte an matukaw na ex-officio member sa Sanggunian Panlalawigan kan Camarines Sur na marepresentar kan Liga ng mga Barangay matapos ganahon an pirilian sa Liga kan Hulyo 30 na ginibo sa sarong Hotel sa Ciudad nin Naga. Si Liga President Ralan Besinio kan Baao, Camarines Sur iyo an gana contra ki Liga President Mel Santiago kan banwaan nin Cabusao sa voto 22 contra 14. Si Santiago, kaalyado ni Congresista Rolando Andaya Jr. kan premir distrito kan Camarines Sur na macandidatong gobernador laban ki Villafuerte sa nakatalaan na pirilian lokal sa Mayo 2019. An bagong pamayo kan Liga pinsan ni Alcalde Jep Besinio kan banwaan nin Baao nagpahayag na ipapadagos niya an mga proyecto asin programa kan saiyang pigribayan na Liga Presidente asin nagcierto na saiyang dadarahon an voces kan Barangay sa Sanggunian Panlalawigan. Base sa listahan kan opisina provincial kan Commission on Election, mayoria sa mga ganador na opisyales de barangay kaalyado kan mag-amang Congresista LRay Villafuerte kan segundo distrito kan CamSur asin Gob. Villafuerte. An pirilian sa barangay sarong non-political, alagad pinapakiaraman man giraray kan mga politico sagcod sa Liga election maging sa Sanggunian Kabataan (SK).