Mga politico sa Albay nagtatarabang sa proyecto, sa CamSur daing unidad

Saludo si dating Juez asin Presidential Adviser for Bicol Affairs (PABA) Marvel Clavecilla sa mga politico sa provincia nin Albay huli ta nagtatarabangan nganing magpadagos-dagos an implementasyon kan Bicol International Airport sa Daraga, Albay alagad digdi sa Camarines Sur kulang sa cooperasyon nganing marealisar na an re-orientation kan Naga Airport. Mayong problema sa Albay mantang nagtatarabangan pa sa pag-solicit nin fondo alagad digdi sa Camarines Sur mayong unidad mala ngani igwang politico mabugtak man nin aeropuerto sa saiyang sakop na distrito, sabi pa. An ika-duwang aeropuerto na saiyang nasambitan iyo an ibubugtak sa San Jose, Camarines Sur na proyecto ni Congresista Noli Fuentebella na nagkaigwa na nin groundbreaking ceremony kan nagtalikod na taon na bisita mismo si DOTC Secretary Arthur Tugade. Si Clavecilla nagsabi pa bilang taga Partido area pabor man kuta siya sa San Jose Airport alagad envez magagamit an fondo para sa expansion project kan Naga Airport na namumugtak sa Pili, Camarines Sur an mangyayari madalagan an ibang fondo sa sarong propuestong aeropuerto. Enot nang sinabi ni Congresista Fuentebella an fondo sa ika-duwang aeropuerto sa Camarines Sur kukuanon sa build-build-build program ni Presidente Rodrigo Duterte. Padagos pang na-aabala an implementasyon kan re-orientation project kan Naga Airport huli kan pendiente pang caso sa corte na sinangat kan grupo nin paraoma contra sa Capitolyo Provincial kan Camarines Sur. Nagrereclamo an paraoma huli ta apektado an saindang mahiwas na kaomahan na hahagopon kan right of way sa pagpahiwas kan aeropuerto. An reparo kan PABA sa nagpapadagos na Bicol International Airport kun marealisar ini permi nang mapaparalisar an viaje kan aeroplano kun nagtutuga an Volcan Mayon, kun nagtatarabangan an mga politico sa Camarines Sur dakulang bagay an Naga Airport mientras na dai ini apektado kan pagpurong-pusong kan mayon. An sektor nin negociante sa Camarines Sur haloy nang naghahagad sa gobierno nasyonal na mapadali na an proyecto sa sinambit na aeropuerto. Sinda Bise Presidente Leni Robredo, Congresista Gabriel H. Bordado Jr. kan tercer distrito kan Camarines Sur, Congresista LRay Villafuerte kan segundo distrito asin Congresista Salvio Fortuno kan ika-limang distrito kan provinciang ini anas nagtatarabangan sa expansion project kan Naga Airport. (dpa)