Migz tinutuwadan na nin mga kaalyado: Andaya-Peachy tandem sa 2019

Ciudad nin Iriga – Duwang bulan antes kan pagplantiar nin certifico de candidatura sa Comelec, saro sa pusog na lider sa politica sa Rinconada area, tinuwadan na an kampo ni Gobernador Migz Villafuerte asin igwa pang mga vocal asin alcalde an masunod nganing mag-alyado ki Congresista Rolando Andaya Jr.(PDP-Laban) kan premir distrito kan Camarines Sur na kumfirmado nang macandidatong gobernador sa maabot na pirilian sa Mayo 2019. Si Alcalde Madel Yorobe Alfelor kan Ciudad nin Iriga nag-atubang na sa press conference kan Martes, Agosto 7, 2018 na ginibo sa Ciudad nin Iriga asin saiyang kinumfirmar an alok ni Andaya na iyo an tatambodan na candidatong congresswoman kan ika-limang distrito. Hinanakit an saro sa dahilan kan saiyang pagtalikod sa kampo kan Villafuerte huli ta tinugaan na iyo an tatambudan na candidatong congresswoman mantang ultimo nang termino ni Congresista Salvio Fortuno alagad sagcod sana sa pangako huli ta an iriribay na candidato iyo si Jocelyn Fortuno, esposa kan nagtutukaw na representante kan Rinconada district. Sinabi pa na bilog an suporta ninda ki Fortuno kan pirilian kan May 2016 election sa orolay na siya na an iriribay. Pigbuyagyag pa kan alcalde na masunod sa saiya iyo si Bise Alcalde Villanueva asin an mayoriang miembros kan Sangguniang Panlungsod, igwa pang mga alcalde asin vocal sa Rinconda district an haros cierto nang mabalyo sa kampo ni Andaya. Antes naging jefe ejecutivo, dating miembro kan junta provincial na nagrerepresentar kan Rinconada district. Saiyang sinuportaran an candidatura ni Fortuno kan ini mag re-election kan nakaaging May 2016 election. TUYAW NI LRAY VS ALFELOR Dai palang nahahaloy si Congresista LRay Villafuerte kan segundo distrito kan Camarines Sur tinuyaw an pagbalyo ni Alcalde Alfelor apesar kan asegurasyon kan saiyang leyaltad sa mga Villafuerte alagad yaon sa kampo kan magiging kalaban sa kargong gobernador kan saiyang aki na si Gobernador Migz. Natintaran sa cuarta si Alcalde Alfelor marhay an iribahan me mala ngani nagsabi pa na dai siya tiwala ki Andaya asin mayong siyang palabra de onor, sabi pa. ANDAYA-PEACHY TANDEM Afuera sa alcalde, si Atty. Peachy Alfelor-Moraleda nagpahayag naman sa media na inako na niya an alok ni Congresista Andaya na maging ka-tandem sa maabot na pirilian lokal. Si Moraleda, Presidente kan UNEP sa Ciudad nin Iriga nagcandidato nang bise gobernador kan pirilian lokal kan Mayo 2016 alagad dinaog ni Bise Gobernador Fortunato Peña. Sa maabot na pirilian liwat siyang maribansa asin saiyang makakalaban iyo si dating Bise Gobernador Imelda Papin na kaalyado ni Gob. Migz. Sa tercer distrito kan Camarines Sur sinda Alcalde Henry Ragodon kan banwaan nin Canaman asin Bise Alcalde Rolando Eduardo kan Camaligan nagbalyo na sa kampo ni Andaya. Sinabi ni Andaya na igwa pang ibang alcalde sa Partido district asin iba pang distrito an maalyado na sa saiya sa maabot na pirilian. (DPAureus)