Muslim community sa Naga, nagsusuporta sa BOL


Naglalaom an comunidad nin mga Muslim sa Ciudad nin Naga na makakaresolber sa problema sa paz y orden sa Mindanao an pagkakamukna kan Bangsamoro Organic Law (BOL) kasunod kan pagkaka-aprobar kaini bilang Acta Republika 11054 ni Presidente Rodrigo Duterte dai palang nahahaloy. Kun nagkakaigwang tiripon an grupo nin mga Muslim sa Ciudad nin Naga asin nagiging tema ninda an pigtutulod na federalismo kan presenting administrasyon asin an isyu sa BOL, mayo ni saro an nag-ooponer asin bilog an saindang suporta nganing makahawas na sa problema sa economia asin paz y orden an tugang nindang Muslim sa rehiyon kan Mindanao. Ini an mga pahayag sa Bicol Mail ni Mike Mustapa, Presidente kan Marawi Guilt Solidarity Inc. na sarong organisasyon nin mga Muslim sa Naga na haloy nang nag-eerok digdi, alagad saiyang sinabi dawa aprobado na an BOL mayo na sindang plano na magbuelta sa Mindanao mientras na marhay na an saindang pagbuhay sa ciudad. An Acta Republica 11054, sarong ley na nagmumukna kan Bangsamoro Autonomous Region na nagriribay kan Autonomous Region in Muslim Mindanao (ARRM). Dati nang pigponan an debate sa Congreso an propuestong BOL kan panahon ni dating Presidente Benigno Aquino III alagad naging halawig si deliberasyon sagcod na abalang naaprobaran. An BOL isusunad sa mga tawo kun saindang papaboran o contra digdi sa paagi kan itatalaan plebicito kan Commission on Election. Kun tutugotan kan Comelec an grupo nin mga Muslim sa ibang provincia na magparticipar sa plebicito saindang susuportaran an ley, sabi pa. Mayo na sindang eestaran sa Ciudad nin Marawi matapos wasakon nin sunod-sunod na bomba kan soldados kan gobierno huli kan nangyari guiera contra sa armadong grupo nin mga Isis. An BOL compuesto nin apat na ciudades na kinababalihan kan Marawi, Cotabato, Lamitan asin Isabela asin limang provincia sa Mindanao. Aaboton sa setenta por ciento an mga Muslim asin treinte por ciento mga catolico asin iba pang relihiyon sa Mindanao.