BFP LIKAY SA CASO: Nagsasayumang mag-isyu occupancy permit sa BMC


Nanindugan an Bureau of Fire Protection (BFP) sa Ciudad nin Naga na dai sinda ma-isyu nin occupancy permit sa bagong 5th asin 8th storey building kan Bicol Medical Center (BMC) kun ipapadagos an desinyo kan hospital na an saindang operating room (OR) namumugtak sa ika-tolong escalon asin nagkukulang pa nin mga fire exit. An pag-isyu nin occupancy permit na an OR yaon sa ika-tolong escalon kan hospital mabalga sinda sa Acta Republica 9514 kan Fire Code of the Philippines asin kun dai ninda iimplementar igwa sindang sisimbagon sa ley. Ini an mga pahayag ni Fire Marshal Chief Inspector Jose Callos kan BFP sa Ciudad nin Naga sa ginigibong inquiry ni dating Juez asin Presidential Adviser for Bicol Affairs (PABA) Marvel Clavecilla sa nangyayaring abalang operasyon sa bagong mga edificio kan BMC na duwang taon nang tapos an edificio alagad padagos na dai napapakinabangan an pigsasabing world class building kan hospital. An PABA asin Presidential Anti-Corruption Commission (PACC) na pinamamayohan ni Commodore Dante Jimenez nagtatabang sa paghanap nin solusyon nganing magamit an darakulang edificio kan hospital sa tahaw kan nangyayaring suroksukon kan ginatos na mga pasyente sa lomang edificio kaini. Kan nakaaging Juevez, Agosto 16 pinaapod kan PABA asin PACC si Dr. Maria Estrella Litam, jefe kan BMC kaibanan an saiyang mga staff, E.M Cuerto Inc. contractor kan edificio na pinangenotan kan saindang Presidente na si Arch. Celerino Cuerto asin Danilo Lucenario, Fire Marshall Chief Inspector Jose Callos, City Engineer Leon Palmiano IV kan City Hall asin iba pang envueltong ahencia. Nagpaliwanag man si Architect Cuerto na dapat iconsiderar kan BFP Naga na matawan occupancy permit an BMC huli ta iyo na ini an pigsusunod na international standard kan DOH na puede na sa third floor an OR. Alagad nanindugan si Fire Marshall Callos na saiyang estrictong iimplementar an Section 10.2, 10.1 para C kan IRR kan RA 9514 na pigsasabi digdi na ‘’Provides that the Emergency Rooms, Operating Rooms, Intense Care Units, Delivery Rooms and other similar facilities shall not be located more than one storey above or below the floor.” An groundfloor kan 4th asin 5th storey building iyo pa sana an saindang natatawan nin partial occupancy permit. BMC NAGHAHAGAD RECONSIDERASYON SA BFP MANILA ASIN DILG Si Dr. Litam nagpaliwanag sa PABA asin mga opisyal kan PACC na an desinyo kan DOH sa bagong edificio pigsunod sana kan contractor. Huli kaini, naghahagad na an BMC nin reconsiderayon sa National Headquarters kan BFP asin sa Department of Interior and Local Government sa Manila na nakakasakop kan BFP alagad hinagad ni Usec Clavecilla na tawan sinda nin kopya kan surat sa duwang ahencia mantang matabang sinda nganing ma-follow up na matawan nin exemption. Napag-araman ni Usec Clavecilla na igwang ibang mga hospital na natawan nin occupancy permit kan BFP na an OR namumugtak sa third floor arog kan Bicol Regional Training and Teaching Hospital sa Albay, Saint Luke Hospital sa Manila asin sa Bicol Access digdi sa Ciudad nin Naga alagad an bagay na ini dai pa makumfirmar kan opisina kan PABA. Gustong sabihon kun puede duman de puede man sa BMC na magkaigwa nalang nin rampa para sa - exit asin entrance hali sa Emergency Room pasiring sa Operating Room sa third floor kun puede ini nganing mapadali na an operasyon kan BMC, sabi pa ni Clavecilla. ‘’Mahalat sinda sa magiging desisyon kan opisina central kan BFP asin DILG mantang nag-aalangan an BFP sa Ciudad nin Naga huli ta igwa siyang sisimbagon sa pagbalga kan Fire Code’’ TRABAJO LANG MAYONG PERSONALAN Dinagdag pa kan PABA an saindang prioridad na mapa-angat an economic condition sa Bikol mientras na an importante sa sainda iyo an programa sa salud nganing matabangan an Bikolano envez na maggastos nin dakulang cantidad sa mga hospital sa Manila maging sa pribadong hospital sa Ciudad nin Naga, mababawasan an gastos kan mga pasyente. ‘’Ini an gusto ming ipaabot sa BMC, sabi ko ngani ki Dr. Litam mayo kitang personalan trabajo lang’’, sabi pa. (DPAureus)