City Hall anggot sa sahot ni Duterte

Isinisikwal kan City Hall an alegasyon ni Presidente Rodrigo Duterte na sarong Hotbed sa droga an Ciudad nin Naga mantang mayo man nganing pinaluwas na basehan nagrasag lang kan sinambit na acusasyon. Maging hali sa arin man na ahencia de gobierno na envuelto sa campaña sa ilegal na droga mayo man nin nagpapaluwas nin report na an Ciudad nin Naga sarong hotbed sa ilegal na droga. Ini an mga pahayag ni Alcalde John Bongat sa acusasyon kan Presidente na kinaanggot na ngonian kan opisyales lokal asin kan Nagueño na sinda mismo an makakapagsabi. ‘’An pigsasabing hotbed iba sa shabu lang mientras na ini lakop naman dawa saen na lugar o rehiyon alagad an pigsasabing hotbed sa ilegal na droga an Naga, an gustong sabihon talagang haros mayo nang nagiginibo an mga opisyales lokal, an mga tawo mayo nang kamugtakan huli ta lolong na sa ilegal na droga, yaon na digdi an lugar kan shabu asin nangangahulogan na mayong katututuanan asin daing basehan. Kan nakaagi pang administrasyon ni Alcalde Jesse M. Robredo padagos an paglaban sa ilegal na droga sagcod kan presenteng gobierno lokal asin igwa pang mga programa laban sa droga’’, sabi pa. Sa Sangguniang Panlungsod sa pamamayo ni Bise Alcalde Nelson Legacion naging joint and collective an pinasar na resolution na nagkukundenar kan sahot ni Presidente Duterte. Afuera pa kaini sa mga LGU, an Ciudad nin Naga iyo sana an igwang Dangerous Drug Board na igwang permanteng opisina na aroaldaw nakatutok sa campaña sa ilegal na droga. An opisinang ini envuelto sa advocacy, education, katuwang an Naga City Police Office, Philippine Drug Enforcement Agency asin nagtatabang pa sa rehabilitasyon sa biktima kan droga. Pigmukna an opisina kan Naga City Dangerous Drug Board (NCDDB) huli ta bako lang an mga law enforcer an kaipuhan sa paglaban contra droga envez dakulang suporta an LGU. Mismo an DILG digdi aram na nagtatabang an City Hall sa mga programa kan administrasyon Duterte contra droga alagad na suprisa sana sindang opisyales lokal na an mga alegasyon na hotbed sa droga hali sa pinakapamayo kan nasyon. An NCDDB na mukna kan mag-asumir sa puesto komo jefe ejecutivo si Bongat kan taon 2010 hasta sa ngonian padagos na activo sa saindang misyon sa campaña sa droga. (dpa)