ISYU SA HOTBED SA DROGA: Kun gustong rauton an Naga, ako na lang-Leni

Kun gustong rauton ni Presidente Rodrigo Duterte an Ciudad nin Naga na inapod niyang ‘’hotbed’’ sa ilegal na droga sa dahilan na an Bise Presidente taga Ciudad nin Naga asin pamomolitica sana mas marhay pang ako na sana an rauton kun ako naman an puntariya niya. Ini an reaksyon ni Bise Presidente Leni Robredo kan mag-atubang sa miembros kan media sa Ciudad nin Naga huli ta an sahot na iyan insulto sa gabos na mga taga Naga sa tahaw kan mga ginigibong programa kan City Hall sa campana laban sa droga maging kan iba pang ahencia de gobierno asin kan mga Nagueno nganing malinig an satong pangaran. Sinabi pa ni Robredo, ako nalang rauton niya nganing mayong ibang makakadamay mantang ako lang. Saiyang pighalimbawa si Alcalde John Bongat masiyam nang taon bilang jefe ejecutivo kan City Hall pigpapagalang niya an gabos nganing mapa-asenso an ciudad mala ngani sunod-sunod an mga achievement award asin dakul pang mga acomplisimiento. Antes naging jefe ejecutivo si Bongat, an esposo kan Bise Presidente na si dating Alcalde asin DILG Secretary Jesse M. Robredo perang taon pigsakripisyohan nganing maabot kun yaon saen na ngonian an ciudad alagad mayo ninda magigibo kun mayo man sa likod an bilog na namamanuan kan ciudad, sabi pa. ‘’Sa sakuya kun politica an intensyon dapat si mga politico sana an idamay, bako na an ciudad huli ta bako man ining tama’’. Dinagdag pa na kun sasabihon na ‘’hotbed’’ sa droga an ciudad dakulang sampaling sa lalawgon sa gabos na nagpapagal nganing mapa-angat an bandera kan ciudad asin kun babasehan kan nakaagi sanang aldaw nanggana an ciudad bilang No. 1 sa Economic Dynamism sa bilog na nasyon, No. 2 sa 112 na local component cities, No. 2 bilang competitiveness sa apat nang taon poon kan 2015, 2016, 2017 asin 2018 asin dakul pang mga onra huli sa liderato ni Alcalde Bongat. An sinambit na acusasyon pusog na pigpoprotesta kan City Hall mantang malinaw ini na pangraraot sa reputasyon na mayong man nin katutuanan asin basehan, sabi pa kan Bise Presidente. Sa Sanggunian Panlungsod sa pamamayo ni Bise Alcalde Nelson Legacion nagkasararo sa paagi nin joint and collective motion nagpasar nin resolucion na na-aanggot sa mga pahayag kan presidente huli sa mayong dahilan basta lang napaluwas nin statement na maraot sa reputasyon kan ciudad. Sa huring parte kan resolucion sinabi ‘’BE IT RESOLVED, as hereby resolved, TO EXPRESS IN NO EQUIVOCAL TERMS THE CITY OF NAGA’S DEEP INDIGNATION OVER THE STATEMENT OF PRESIDENT RODRIGO DUTERTE THAT NAGA CITY WAS ONCE A ‘’HOTBED OF SHABU’’ APPARENTLY UTTERED FOR NO OTHER PURPOSE BUT SELFISH ‘’POLITICKING’’.