SA FESTIVIDAD NI INA: Pagsukbit armas ipapangalad

Liwat ipapasunod kan Philippine National Police (PNP) an doceng aldaw na total gun ban nganing maseguro an seguridad sa Ciudad nin Naga sa piglalaoman na labi sa on milyon na mga bisita asin mga lokal man o dayuhan devotos sa panahon kan pag-obserbar kan Festividad kan satong Nuestra Señora de Peñafrancia na masikad sa Septiembre 7 hasta 16 alagad amay nang iimplementar ini sa Juevez, Septiembre 6 hasta 18. Si Consejal Joselito Del Rosario, pamayo kan Committee on Public Safety sa Sanggunian Panlungsod nagpahayag sa Bicol Mail na tolong taon nang nakaagi nagpapangalad an City Hall asin PNP sa pagsukbit nin armas kun panahon nin Peñafrancia fiesta na tolos man inaaprobaran kan Camp Crame. An consejal iyo an nagpadreno kan resolucion na liwat iimplementar sa ciudad an gun ban na suportado kan gabos na miembros kan Sanggunian Panlungsod sa pamamayo ni Bise Alcalde Nelson Legacion asin aprobado na ni Alcalde John Bongat. Sa tolong taon nang nakaaging Festividad ni Ina, an higher command kan PNP inaaprobaran ninda tolos an kahagadan kan City Hall asin sa liderato ngonian ni PNP Chief Director General Oscar Albayalde cierto man ining ma-aaprobaran asin piglalaoman na maabot ngonian na semana an directiva sa Bikol PNP asin NCPO nganing estrictong iimplementar an pagpangalad nin pagsukbit nin armas. Sa panahon na nag-efecto na an gun ban an gabos na permits to carry firearms luwas sa residencia suspendido na poon sa Septiembre 6 hasta 17 ngonian na taon. Sinabi pa kan pamayo kan Committee on Public Safety an pagpangalad dakulang bagay nganing malikayan an mga insidente na may relasyon sa pagsukbit nin armas na puedeng gibohon kan mga mararaot na elemento na macrear nin kariribokan sa panahon kan actividades relihoso. Tutugotan sana na magsukbit nin armas iyo an miembros kan PNP, AFP asin iba pang ahencia nin awtoridad na naka-duty asin nakasulot kan saindang uniporme. Afuera kan pagpangalad pagsukbit nin armas si Alcalde John Bongat naghagad na nin labi sa on mil na augmentation force kan PNP sa Camp Semion Ola tanganing maging katuwang kan NCPO sa pagmantenir kan paz y orden sa tahaw kan piglalaoman na sobra sa on milyon na devotos hali sa manlaen-laen na provincia asin ibang nasyon an maarabotan sa Ciudad nin Naga nganing magsungko sa imahen ni Ina an patrona kan Bikolandia. Maging an 9th Infantry Division kan Philippine Army sa Bikol na may base sa Camp Elias Angeles, Pili, Camarines Sur an nakatalaan magpadara kan saindang augmentation force. Planong huroton liwat kan PNP asin City Hall sa mga companiya nin telepono na komo parte sa pag-andam sa seguridad ipasunod giraray an pagputol muna nin signal kan saindang cellular phone communication operations antes magpoon an traslacion procession sa Viernes, Septiembre 7 asin sa fluvial procession sa Sabado, Septiembre 15. An Joint Operation Center (JOC) kan City Hall na componido nin mga ahencia nin awtoridad, simbahan, DOH, BMC, City Health Office, LTO, Philippine Red Cross, DPWH, Kabalikat Civicom, asin mga organisasyon civico asin dakul pang ibang grupo an padagos kan saindang mga ginigibong pagplano nganing maseguro an paz y orden asin iba pang actividades sa kapiestahan kan Ina kan Bikolandia.