Pang-iipit ki Senador Trillanes kinukondena kan Makabayan Bikol

Kinukondenar kan Makabayan Bikol an padagos na pang-iipit ni Presidente Rodrigo Duterte sa mga nagcocontra sa saiyang administrasyon asin an pinakahuri naman na biktima iyo si Senador Antonio Trillanes IV matapos bawion si pig-isyung amnestiya kan panahon ni dating Presidente Benigno Aquino III matapos magpaluwas nin Presidential Proclamation No. 572 asin pinapa-arestar an senador. Alagad dai ma-implementar an mandamiento de aresto kasunod kan ginibong pagcuestion sa jusgado kan pig-isyung presidential proclamation. Si Tess Pielago, regional coordinator kan Makabayan Bikol nagsabi malinaw na sarong political repression asin political persecution an pagbawi kan Presidente kan amnestiya mantang kritico sa administrasyon Duterte an senador. Nagtutubod an Makabayan Bikol na malinaw na pang-iipit an ginibo ni Duterte na kun kritico ka asin nagpapahayag nin paglaban sa saiyang administrasyon arog kan ginigibo kan Makabayan Block, siring kan mga activista, mga legal defenders, human rights defenders malinaw na mga persecution arog kan nangyari ki Senador Lelia De Lima, Lisa Masa, Ka Satur Ocampo, Ka Paeng, Teddy Casino asin an pinakahuri si Senador Trillanes, ini langtadan na persecution politically. An gawing ini sarong diversionary tactic sa tahaw kan inaatubang na inflation rate kan nasyon na mayormenteng apektado an mga nagtitios na familia, sabi pa. Nagtutubod sinda sa sabi kan mga experto sa ley asin sa proceso na inagihan ni Trillanes, legal asin nag-agi siya sa tamang proceso sa pagkaigwa nin amnestiya, nag-applay siya dai matatawan nin certificasyon kun dai nag-applay asin inaako niya an responsabilidad sa Oakwood mutiny kan taon dos mil tres. Si Trillanes, dating Navy Officer nanindugan na ipapadagos niya an laban legal contra sa aksyon sa saiya ni Duterte. Alagad sinabi pa ni Pielago na an daing data kaini, perming nangyayari sa satong sociodad pag-igwang nagiging mainit na mga isyu laban sa administrasyon pighahanapan na matakopan an nagtitinding krisis na nangyayari man ini sa administrasyon ni dating Presidente Gloria Macapagal-Arroyo. An senador na nakakuang amnestiya siyam nang taon an nakakaagi alagad padagos an pangapodan kan Makabayan siring kan Karapatan Bikol asin Karapatan nasyonal na dapat palibrehon na si mga political prisoners asin ipadagos an peace talk. Dapat midmidon an saindang mga individual rights na magpahayag kan saindang panindugan para sa satong nasyon, sabi pa kan Makabayan Bikol. Pag-igwang mga nangyayari contra sa administrasyon perming pigtutukdo an ‘’dilawan’’ o Liberal Party, kritico kan administrasyon asin Makabayan Block. Arog kaini si nangyari kan pagdeclara nin Martial law ni dipuntong diktador Ferdinand Marcos. Nagpagamit si dating Senador Juan Ponce Enrile sa paagi nin saging-saging ambush.