Mga traydor na politico sinipa

Ciudad nin Iriga. Pinahimotikan ni Gobernador Migz Villafuerte na tinutuwadan na sinda nin mga kaalyado sa ika-limang distrito maging sa iba pang congressional district kan Camarines Sur envez saindang sinisipa sa grupo an mga traydor na politico. Ini an mainit na mga pahayag kan gobernador sa saindang pagpaheling nin fuersa nin mga candidato lokal sa maabot na midterm election sa Rinconada district kan mag-atubang sa press conference sa Ciudad nin Iriga kan Martes, Septiembre 18 na ginibo sa Ciudad nin Iriga kaibanan sinda Congresista Salvio Fortuno kan ika-limang distrito, Congresista LRay Villafuerte kan segundo distrito asin iba pang mga kaalyado sa PDP-Laban asin NP. ‘‘Fake news na hinahalian na kami nin mga lider, dakul na sindang sinabi alagad mayong sarong tataramon’’. Kabali sa saiyang inakusaran si Alcalde Margarita Aguinillo kan Buhi, CamSur huli ta igwa sindang orolay na saro sanang termino bilang alcalde alagad sinabi kan gobernador na ano na palang si gabos niyang sakripisyo, gastos sa eleksyon nalingawan na. ‘’Nagdakula an payo, habo ta sa tawo na mayong sarong tataramon. Inakusaran man si Alcalde Henry Ragodon kan Canaman, CSur mantang igwa man sindang orolay ni LRV, Congresista LRay na dai papalabanon an saindang mga lider sa mga brgy. kan Canaman alagad pag-abot nin eleksyon nagtrador nagbugtak nin candidatong presidente kan Liga ng mga Barangay. Sa Lagonoy, CSur saiya man pig-akusaran an dati nindang kaalyado na si Alcalde Gigie Pilapil sagcod na inapod kan gobernador na ‘’notorious’’ nagtraydor sa ultimo ora kan nakaaging eleksyon lokal kan 2013 nadakop ninda na hinali si pangaran sa sample ballot ninda Vokal Badong Simando, congressional candidate Aga Mulach asin nangyari pa ini kan pirilian kan 2016. Sa Ciudad nin Iriga, si pangako ni Alcalde Madel Alfelor na dai siya babayaan sa maabot na midterm election mala ngani pig-indorsar pa si Mrs. Jo Fortuno na saiyang susuportaran alagad biglang nagtalikod asin yaon na sa campo ni Congresista Rolando Andaya Jr. na madalagan sa cargong gobernador. Kun sinasabi ni Andaya na nagbabalyo sa saiya an mga lider kan mag-amang Villafuerte, alagad nagbalyo sa saiya an mga nagtraydor, sabi pa kan gobernador. TINAONG CUARTA PINAPABUELTA NI LRAY Matapos maghali sa campo kan Villafuerte sinda Alcalde Afelor kan Ciudad nin Iriga asin Alcalde Avenillo kan banwaan nin Buhi na parejong tinawan nin ayuda kan nakaaging pirilian kan 2016, inapodan ni Congresista Villafuerte sa paagi kan press conference na ibalik na ninda an cuarta. Cantidad P5 milyones an dapat ibalik ni Alfelor asin P1 milyon ki Aguinillo. Sinabi pa ni LRay nag-text na sa saiya an alcalde kan Iriga na ibabalik an cuarta alagad bako pa ngonian mantang an jefe ejecutivo kan Buhi mayo pang kasimbagan. MGA CANDIDATO SA RINCONADA DISTRICT PIG-INDORSAR NA Si Congresista Salvio Fortuno pamayo kan Partido Nationalista, saiya nang pig-ngaran na saindang mga opisyal na mga candidato sa maabot na pirilian lokal sa Mayo 2018 asin sinda suportado kan mga kaalyado kan mag-amang Villafuerte sagcod na pinaheling an fuersa kan mga lider hali sa 226 na mga barangay kan Rinconada district. Pinangenotan ni Jo Fortuno komo masunod na candidatong congresista, dating Consejal Emmanuel Nonokoy Alfelor bilang candidatong alcalde sa Ciudad nin Iriga, Alcalde Frank Bernardez kan Bato, Bise Alcalde Rey Lacoste kan Buhi, Alcalde Jep Besinio kan Baao, Mrs. Bagasbas kan Balatan, asin an mabueltang macandidatong alcalde Atty. Fer Simbulan kan Nabua. Sa mga candidatong Vokal sinda Pochokoy Oliva, Manny Noble asin Manny Cuadrante. An pagbuelta sa politica ni dating consejal Nonokoy saiya man sanang makakalaban sa cargong alcalde an saiyang pinsan na dating Alcalde Gang-gang Afelor. Sa sinambit na press conference presente man si dating Bise Gobernador Imelda Papin na magiging ka-tandem ni Gobernador Migz.