P523.6 M fondo sa ESA ipapadara na sa Capitolyo

An opisina rehiyonal kan Department of Social Welfare and Development (DSWD) sa Bikol nag-asegurar sa Capitolyo Provincial kan Camarines Sur na posibleng ngonian na semana sainda nang i-down load sa provincia an cantidad P523.6 milyones nganing marecibe na kan natatada pang benepisyaryo kan Emergency Shelter Assistance (ESA) na biktima ni bagyong ‘’Nina’’ kan nakaaging 2016. Ini an paglinaw ni Gobernador Migz Villafuerte sa tahaw kan akusasyon kan saiyang mga kalaban sa politica na ginamit sa pambakal nin bagas kan provincia an fondo na ayuda para sa biktima kan nakaaging calamidad sa Camarines Sur. Prueba kaini, saiya pa sanang narecibe an surat hali ki DSWD Regional Director Arnel Garcia petsado Septiembre 17 na nag-iinformar nakatalaan nang i-down load sa gobierno provincial an total na cantidad na P523,650,000 nganing idistribuer sa natatadang 52,405 na benepisyaryo sa Camarines Sur na partially damage an saindang mga harong kan nakaaging calamidad. Sinabi pa kan DSWD na saindang ipapadara an kopya kan payroll oras na makua na an tsikie na ipapadara ano man na aldaw ngonian o sa masunod na semana. An enot na batch na cantidad P400 milyones pig-down load na sa provincia kan Marso 2018 na naitao na sa mga benepisyaryo kan Capitolyo sa laog nin duwang bulan. Dati nang nagkaigwa nin isyu sa pagdistrubuer kan Capitolyo kan ESA fund na ginagamit sa politica kan gobernador alagad pinahimotikan an sahot na ini mantang sinda ngani an naglakaw nganing matawan ayuda an biktima kan nakaaging bagyong ‘’Nina’’. Sinabi man ni Director Garcia an fondo hali sa saindang opisina central kan DSWD nganing matawan ayuda an biktima kan nakaaging calamidad asin pinaagi sana sa lokal na gobierno an pagdistrubuer kan ESA.