SA CASURECO II: Pagdakit kan mga electrical post poponan na kan bagong OIC GM

An bagong OIC General Manager kan Camarines Sur II Electric Cooperative (Casureco II) nag-aandam na kan saindang pagdakit kan mga electrical post na apektado kan road widening project kan DPWH mantang nakatalaan nang mag-abot ngonian na semana an binarakal na mga heavy equipment hali sa ibang nasyon. Si Director Jun Cornelio kan Naga North District nagpahayag na saro sa tatawan prioridad kan saindang OIC GM Emerlina Candia iyo an naabalang implementasyon kan relokasyon kan mga poste sa panahon kan hinali nang Project Supervisor asin Acting General Manager Engr. Nelson Lalas. Si Lalas pig-recall na kan National Electrification Administration (NEA) epektibo kan Septiembre 15 asin niribayan siya ni Candia na iyo an pig-recomendar kan junta directiva na magtukaw komo OIC mantang dai pa nakakapili nin permanenteng general manager. Saro sa causa kan pag-recall kan NEA iyo an maluyang performance nganing ma-implementar tolos an pagdakit kan mga poste na ulang nang marhay sa proyecto kan DPWH. Sinabi ni Cornelio na yaon na sa Bureau of Custom an tolong mga heavy equipment na piglalaoman makakaabot na digdi sa Ciudad nin Naga ano man na aldaw sa masunod na semana dai lang maabala an pagpaluwas kaini kan custom. An mga heavy equipment na milyones pesos an cantidad alagad dai pa pig-detalye kan Casureco II an cantidad kaini kinababalihan nin pang-gabot nin mga poste, pangbuhat kan ibabalyong transformer asin pangkalot sa tatalbongan kan mga electrical post. Tapos na an sarong taon na peryodo sa pagdakit kan mga poste base sa Joint Circular kan DPWH asin Department of Energy asin sa dai mahahaloy poponan na kan bagong magtukaw na OIC GM, sabi pa ni Cornelio. Sa Ciudad nin Naga sana sa cuentada kan Casureco II abot sa P16 milyones an babayadan kan DPWH, alagad sa sadiring cuentada kan obras publica dapat cantidad sanang P9 milyones. Gabos na apektado kan proyecto kan DPWH dapat halion kan cooperativa nin electricidad an mga ulang na poste. (dpa)