Perez masentro sa padagos na pag-asenso kan ciudad

Nagtutubod si Joe Perez, saro mga aspirante na magin kagawad kan ciudad -- na ngonian nagpapa-sairarom kan proceso kan Team Naga sa pagbilog kan final na linyada para sa maabot na eleksyon sa sarong taon – na an ciudad padagos na maasenso nin huli sa marhay na pag-nenegosyo asin pag-administrarar kan satuyang local na gobyerno.

Si Perez na sa presente iyo an Secretary-General kan Metro Naga Chamber of Commerce and Industry na nagpagirumdum na historically an Naga iyo an centro kan negosyo, particularmente sa retail trading asin entepreneurship, sa enterong rehiyon. Susog saiya, yaon sa Naga an pinakadakul na numero nin mga bangko asin etablisimiento sa enterong rehiyon, kabale na an mga dae mabilang na restaurants and food shops, convenience stores, asin dinagdagan pa nin mga call centers.

Ang mga ini laen pa kan mga darakulang unibersidad asin mga eskwelahan sa gabos na levelo kan akademiya asin edukasyon na mina-translate man into good trade and commerce na iyo an dahilan sa pagtalubo nin mga estaran asin boarding houses, kakanan, transportasyon, asin mga pang-oro-aldaw na pangangaipo.

Nin huli kaini, sinabi ni Perez, na iyo an editor in chief kan peryodikong Bicol Mail, na kun siya maging maswerte na magin miyembrro kan Team Naga, mawot niyang magin efektibong katuwang sa padagos na pagpe-asenso kan ciudad asin urog pang maging moderno, progresibo asin dynamic na centro nin komersyo asin negosyo.

Saro sa mga tutukahan nya iyo an pagpagayon asin pagmantenir nin order asin kalinigan sa laog kan old business district. Kabale man an mga minasunod na programa na mawot niyang aanduyogan kan saiyang magiging pag-iriba sa bagong conseho asin sa ofisina kan alkalde:

Rehabilitasyon asin optimizisation kan pag-gamit kan Naga City People’s Mall;

Pagbukas nin mga bagong tinampo para sa mas marhay na bulos kan trapiko asin mobilisasyon kan mga commuters asin produkto;

Pagmukna nin bagsakan center sa sarong strategic na lugar para sa mga agricultural asin livestock products sosog sa ideya kan Angat Buhay ni VP Leni Robredo;

Pagpatibay kan organisasyon kan mga operador asin kagsadiri kan mga hotel, restaurants asin resorts sa laog kan ciudad asin Metro Naga na masuportar kan mga produkto kan satuyang local na mga paraoma;

Pag-establisar ni magkapirang parke sa laog kan ciudad na pano nin kahoy asin mga burak;

Pag-taong mas mahiwas na espasyo para sa mga alagad kan arte asin kultura kabale na an pag-ataman asin pag-preserbar kan satuyang mga natatadang historial landmarks and icons;

Padagos na pag-market kan Naga bilang centro nin mga national conventions and seminars, sports events, and various academic and scientific conferences;

Asin iba pa, orog na sa lado kan youth, urban poor, women, PWD, senior citizens, solo parents, transport asin iba pang mga sectoral concerns.