SABI KAN PCSO: Operasyon kan STL ipapadagos

Dawa igwang panindugan an lokal na gobierno contra sa operasyon kan Small Town Lottery (STL) alagad base sa charter kan Philippine Charity Sweeptakes Office (PCSO) an Evenchance Gaming Corporation puedeng ipadagos an saindang operasyon dawa mayong business permit an LGU.

Ini an mga pahayag sa Bicol Mail ni Camarines Sur PCSO Provincial Manager Jobet Ramos kasunod kan naging decision kan lokal na gobierno kan Ciudad nin Naga na saindang kinokontra an ano man na operasyon kan sugal maging kan Evenchance sa ciudad dawa pa ini legal.

Dai palang nahahaloy pig-veto ni Alcalde John Bongat an resolution of no objection kan Sanggunian Panlungsod sa operasyon kan STL.

Igwa nang decided cases kaini an corte arog kan nangyari sa sinangat na caso kan LGU Cebu contra sa STL operator maging si caso sa pagbugtak nin lotto station na pigcontra kan LGU Laguna, sagcod na nagsangat nin caso sa corte an Sanggunian Panlalawigan kan Laguna alagad mayo man nangyari paborable an naging decisyon kan jusgado sa lotto operation, sabi pa ni Ramos.

‘’May permit man o mayo an LGU puedeng magpadagos an operasyon kan STL asin puedeng sangatan nin caso an arin man na awtoridad na maarestar kan mga bet collector’’, sabi pa.

Sa caso na pigsangat kan Ciudad nin Mandaluyong sa Regional Trial Court Branch 213 na hinahagad bawion an pig-isyung authority to operate sa operasyon kan Evenchance Corporation alagad ibinasura man giraray an petisyon kan LGU, gustong sabihon magpapadagos an operasyon kan Evenchance, sabi pa.

Kun magpadagos man an STL sa Ciudad nin Naga dawa mayong business permit mayo nang problema legal mantang nationwide ngani an operasyon kaini alagad kun mawot kan City Hall na ‘’i-challenge’’ puedeng gibohon.

Sinabi pa na kaipuhan sanang completohon kan Evenchance an saindang mga rekisitos asin iba pang documentos, kun andam na an corporasyon dapat inpormaran an PCSO Naga Branch asin sainda man ining iindorsar sa main office na iyo an ma-aprobar kun nuarin dapat magpoon.

APLIKASYON KAN EVENCHANCE APROBADO NA KAN PCSO

Antes kan Peñafrancia fiesta, sinabi ni Alcalde Bongat sa miembros kan media na saiyang narecibe an surat ni PCSO General Manager Alexander Balotan na nag-iinpormar na an ahencia inaprobaran na an aplikasyon kan Evenchance nganing magpadagos kan saindang operasyon sa Ciudad nin Naga kasunod kan naging decisyon kan jusgado.

Pigpaliwanag kan PCSO an saindang objetibo kan STL game nganing makakalap nin fondo para sa mga programa sa salud kan LGUs asin medical assistance sa mga pasyente na maninigong tabangan kan ahencia.

Panlaban sa ilegal na sugal na jueteng asin makakatabangan pa sa mayong trabajo.

Afuera sa surat kan PCSO kan Septiembre 5, 2018 nagsurat man ki Alcalde Bongat si Jerome Bañez, Vice President kan Evenchance na naka-attached an surat kan PCSO asin nagpapahayag na por cortesia makua giraray sinda nin business permit sa City Hall.

Alagad an sabi kan jefe ejecutivo na ‘’consistent’’ an saiyang panindugan laban sa ano man na forma nin sugal.