Lorry boat kan MNWD mapapakinabangan na

Inabot nin sarong taon matapos basbasan kan huring semana kan Oktubre 2017, magiging operational man giraray an pinaka-premirong Water Lorry Boat sa Bikol na pinagibo kan Metropolitan Naga Water District (MNWD) matapos mag-isyu na nin certificasyon an opisina rehiyonal kan Maritime Industry Authority (MIA) nganing tugotan na magdalagan sa Bicol river. Si Engr. Virgilio Luansing I, general manager kan MNWD sa Ciudad nin Naga nagpahayag sa Bicol Mail na madadagos na an operasyon kan saindang lorry boat na posibleng marealisar ngonian na bulan nin Oktubre. Sainda nang narecibe an mga certificasyon na pig-isyu kan Septiembre 19, 2018 nganing magdalagan na an lorry boat asin ini kinababalihan kan Load line Certificate, Cargo Ship Safety Certificate asin Certificate of Stability. An sinambit na mga certificasyon mandato kan MIA na completohon muna antes magdalagan an lorry boat kaya dai tolos nakaserbe sa mga consumedores kan MNWD nganing iyo an mag-suplay nin tubig inumon na mayo pa nin koneksyon nin tubig hali sa water district kan ciudad. Si mga residencia na yaon sa gilid kan Bicol river na kinababalihan kan mga banwaan nin Gainza, Camaligan, Canaman, Magarao asin Ciudad nin Naga iyo an saindang susuplayan barato an presyo cada container alagad kun igwang LGUs, mga consumodores luwas sa banwaan kan saindang coverage area andam sindang magsuplay tubig inumom, sabi pa kan MNWD. An lorry boat na ginastosan nin P8 milyones labi nang duwang taon pataw-pataw sa Bicol river sa Camaligan, Camarines Sur mantang an proyecto na-aprobaran kan junta directiva sa panahon ni Board Chairman Fortunato “Tato” Mendoza. Alagad bako lang pagsuplay nin tubig an katuyohan kan MNWD envez magagamit pa ini kun kinakaipuhan sa panahon nin calamidad. (DPA)