Naga igwa nang 106K votantes

An Ciudad nin Naga igwa nang total na 106,434 na rehistradong votantes sa nagtapos na tolong bulan na continuing registration kan Sabado, Septiembre 29, 2018 asin nagdugang nin 10,153 na votantes. Kan nakaaging eleksyon lokal kan Mayo 2016 an Naga igwa sanang 96,281 sa veinte sieteng barangay kan ciudad na nalangkawan ninda an target na maparehistrong cinco hasta ocho por ciento. Si Abogado Maico Julia Jr. Election Officer kan ciudad nagsabi saro sa nakatabang na halangaw si nagpalista sa saindang opisina huli kan ginibong mga satellite registration sa barangay asin escuelahan sagcod sa Bureau of Jail Management and Penology (BJMP). Base sa saindang datus kan bulan nin Hulyo 2018 igwang total na nagpalistang 3,005 votantes, kan Agosto – 3, 404 asin kan nagtalikod na bulan nin Septiembre iyo an pinakalangkaw na nag-abot sa 3,744. Si ultimo diyang rehistrasyon maghapon si nagpirila mala ngani nag-abot sa 454. Saro sa may halangkaw na numero nin mga nagpalista si nag-eestar sa mga subdivision na perang taon nang nag-eestar sa ciudad alagad pinagmarhay na magpalista na sa Comelec Naga. An nakadugang sa listahan kinababalihan nin bagong votantes na nag-eedad nin 18 años, mga nagpa-re activate, transferee, asin igwa pang mga senior citizens na haloy nang nag-eerok sa ciudad. Sa Comelec Camarines Sur, sinabi ni Comelec spokesperson Alexander Marpuri naglalaom nakua ninda si target na cinco hasta ocho por cientong paglangkaw na nagpalista sa dating 1.2 milyon na rehistradong votantes kan nakaaging eleksyon kan Mayo 2016. Maaraman an total na votantes sa provincia sa pigtalaan na Election Registration Board (ERB) meeting na gigibohon sa Oktubre 25, 2018.