PDA dai matutunaw, sabi

Tigaon, Camarines Sur – Magpapadagos an operasyon kan Partido Development Administration (PDA) huli ta enterong sarala an pinaabot na datus kan Capitolyo Provincial kan Camarines Sur na iyo an pinadatulan kan Malacañan sa pagtunaw kaini base sa pinaluwas na Executive Order No. 29. Si Jerold Peña, Chief of Staff ni Congresista Noli Fuentebella sa entrevista kan Bicol Mail sa paagi nin telepono nagsabi sa memorandum order sa tolong rason na pinadatulan gabos salto asin sala. An PDA mayong subsidia hali sa gobierno nasyonal poon na macrear ini nagkaigwa nin ingreso hali sa negosyo sa water system, kun kan mga nakaaging taon nalulugi sa dahilan na nagpopoon pa sana alagad igwa na nin income mala nagtatao na sinda nin devidendo sa gobierno nasyonal. Pinakahuring tinao nagcacantidad nin P1.6 milyon kan Hulyo 2018. An GCG nagpabor na langkawan an sueldo kan mga empleados kan PDA base sa salary standardization law, nag-uyon an ahencia mantang nagkakaigwang ingreso an sinambit na GOCC. Nagtutubod pa an PDA na dai maninigong tunawon an sarong Acta Republica sa paagi sana nin executive memorandum. An Sangguniang Panlalawigan kan Camarines Sur na kapot ni Gobernador Migz Villafuerte maging an saindang mga kaalyadong alcalde sa ika-apat na distrito nagkasararo sa pagpanday nin resolucion nganing hagadon sa Malacañan an pagtunaw kan PDA na namukna sa paagi nin sarong house bill sa congreso na pigpadrenohan ni Congresista Fuentebella sagcod na naging ley sa paagi kan Acta Republica 7820 kan taon 1994. Pang-iipit sana ini kan gobierno provincial sa pamamayo ni Gob Villafuerte asin an apektado kun tutunawon an PDA iyo an rinibong consumedores kan Partido Water System sa 4th Congressional District ni Representante Fuentebella, sabi pa. Si Fuentebella nagsabi na dai matutunaw an PDA sagcod na nabubuhay pa siya. An diputado contra partido political kan mag-amang Congresista LRay Villafuerte asin Gob. Migz. Saro sa isyu iyo na dai man na-implementar an mandato kaini sa laog nin duwang decada na matawan solusyon an poverty incidence sa sinambit na distrito. Malinaw na pamomolitica an desisyon sa pagpa-abolish kan PDA asin an mayormenteng apektado iyo an constituentes kan Partido District, sabi pa. Sagcod sa sinusurat an baretang ini, sabi kan PDA dai pa sinda nakakarecibe kan hard copy kan EO 29 kun igwa man sa social media sana alagad napag-araman pa na mayong Bar Code kan Malacañan. Si dating Gobernador asin Congresista Luis Villafuerte nagpahayag sa entrevista kan nagkaperang estasyon nin radio sa Ciudad nin Naga na igwa nang Acta Republica 10149 na midmid sa apod na GOCC Governance Act of 2011 na pig-aawtorisaran an Governance Commission for GOCC na pag-adalan an gabos na mga Government Owned and Control Corporation, Administration asin Development Authority na kun an operasyon dai na susog sa pigtataong mandato dapat tunawon na o kun dai man puedeng isaro sa ibang ahencia de gobierno asin puede man isa-pribado. Sinabi pa na si naging pag-aadal asin aksyon kan Governance Commission on GOCC pig-recomendar sa Malacañan na ponduhon na an operasyon kan PDA basado sa standard of action na binugtak sa bagong ley kan RA 10149. Nagtutubod an dating gobernador asin congresista an pag-tunaw kan PDA basado sa EO 29 igwang base legal kan bagong acta republica. Sinabi pa na kabali sa mga rason sa pagtunaw kaini huli ta sinda nag-overlap sana sa function asin programa na ginigibo kan ibang ahencia asin haloy nang panahon na ferming pierdida sa lado finansyal. (DPA)